ԵՐԵՎԱՆ, 1 մարտի – Sputnik. Երևանի ընդհանուր իրավասության դատարանի Շենգավիթի նստավայրում՝ դատավոր Աննա Դանիբեկյանի նախագահությամբ, դատարանը որոշեց վերսկսել ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանի՝ ՍԴ դիմելու միջնորդության քննությունը։
Նշենք, որ Ալումյանը միջնորդել էր դիմել Սահմանադրական դատարան՝ պնդելով, որ այն, որ դատարանը օրենքով հնարավորություն չունի պարզաբանելու Ռոբերտ Քոչարյանին և Արմեն Գևորգյանին առաջադրված մեղադրանքը, հակասում է Սահմանադրության 67-րդ հոդվածի 1 կետին և 63 հոդվածի 1 մասին։
Դանիբեկյանը հղում արեց Քր․ Դատ․ -ի 31 հոդվածի 4 մասին, որի համաձայն քրգործի վարույթը կարող է կասեցվել անհրաժեշտ հնարավոր բոլոր դատավարական գործողությունները կատարելուց հետո։ Այս դեպքում դատարանը գտել է, որ առկա են դատավարական գործողություններ, որոնց դատարանը դեռ պետք է անդրադառնա։
Նախագահող դատավորը տեղեկացրեց, որ գործով անցնող «Հայաստան» խմբակցության պատգամավոր Արմեն Գևորգյանը միջնորդություն է ներկայացրել երկրից ժամանակավորապես բացակայելու վերաբերյալ։ Դատարանը գտել է, որ նախքան այդ միջնորդության լուծումը Հայկ Ալումյանի միջնորդությունը չի կարող լուծում ստանալ։
«Խորդակցական սենյակում պարոն Ալումյանի միջնորդության վերաբերյալ դատարանի կողմից կարող էր կայացվել ցանկացած որոշում։ Միջնորդությունը կարող էր մերժվել կամ ամբողջությամբ կամ մասնակի բավարարվել։ Դատարանը հարմար չգտավ լուծել միջնորդությունը, հաշվի առնելով, որ առկա էր դեռևս չկատարված դատավարական գործողություն, որը միջնորդությունն ամբողջությամբ բավարարելու դեպքում և քրեական գործով վարութը կասեցնելու դեպքում չէր կարող կատարվել։ Ալումյանի միջնորդության լուծումը դատարանը հետաձգել է մինչ Արմեն Գևորգյանի նշված միջնորդության լուծումը»,–ասաց Դանիբեկյանը։
Նշենք, որ Արմեն Գևորգյանի միջնորդության քննարկումը պետք է տեղի ունենար այսօր, մինչդեռ Գևորգյանը ԱԺ–ում էր և նրա բացակայությամբ դատարանը հնարավոր չգտավ քննարկել միջնորդությունը , հաշվի առնելով, որ մի շարք հանգամանքներ կան, որոնց պարզաբանումը դատարանն ակնկալում է ստանալ Գևորգյանից։
Դատարանը հայտարարեց ընդմիջում, մինչև Գևորգյանը գա դատարան։