ԱՄՆ միջուկային զենքը պետք է տուն վերադարձվի. Լավրովը ելույթ է ունեցել համաժողովում

Սերգեյ Լավրով
Լավրովի խոսքով` Եվրոպայում գտնվող ամերիկյան միջուկային զենքը պետք է հետ տարվի, իսկ դրա հետ կապված ենթակառուցվածքը` վերացվի։
Sputnik
ԵՐԵՎԱՆ, 1 մարտի – Sputnik. Ռուսաստանն անընդունելի է համարում, որ ԱՄՆ միջուկային զենքը գտնվում է Եվրոպայում, ժամանակն է, որ այն հետ տարվի։ Այս հայտարարությունն արել է ՌԴ արտգործնախարար Սերգեյ Լավրովը՝ ելույթ ունենալով զինաթափմանը նվիրված համաժողովում։
«Մեզ համար անընդունելի է, որ Միջուկային զենքը չտարածելու մասին պայմանագրի հիմնարար դրույթներին հակառակ` ԱՄՆ միջուկային զենքը դեռ գտնվում է եվրոպական մի շարք երկրների տարածքում։ Պահպանվում է «համատեղ միջուկային առաքելությունների» արատավոր պրակտիկան` ՆԱՏՕ-ի ոչ միջուկային երկրների մասնակցությամբ: Դրանց շրջանակներում մշակվում են ՌԴ–ում միջուկային զենքի կիրառման սցենարներ: Վաղուց ժամանակն է տուն վերադարձնել ամերիկյան միջուկային զենքը և ամբողջությամբ վերացնել դրա հետ կապված ենթակառուցվածքը Եվրոպայում»,- ասել է Լավրովը:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: