ԵՐԵՎԱՆ, 28 փետրվարի – Sputnik. Սոցցանցերում հայտնվել են Երևանի «Զվարթնոց» օդանավակայանի լուսանկարները, որոնց գրառման թուրք հեղինակներն այն ներկայացրել են որպես ռուսական գործողության արդյունքում ավերված ուկրաինական օդանավակայան։
TikTok-ում հայտնված նկարներում պատկերված է «Զվարթնոցի» հին կլոր շենքը, որը ներկայումս պահպանվում է որպես հուշարձան։
Հրապարակման հեղինակները ցանկացել են ցույց տալ «ռուսների կողմից ավերված» ուկրաինական օդանավակայանը, ինչի հետևանքով տեղեկատվական «շփոթ» է ստացվել։
Հիշեցնենք, որ Ուկրաինայում ապառազմականացման և ապազգայնականացման ռուսական հատուկ գործողությունը, որը սկսվել էր փետրվարի 24-ին, շարունակվում է մինչև հիմա։
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: