ՌԴ-ի հետ բանակցությունների մեկնած Ուկրաինայի պատվիրակությունն արդեն Բելառուսում է

ԵՐԵՎԱՆ, 28 փետրվարի - Sputnik. Ուկրաինայի պատվիրակությունը, որը բանակցություններ պետք է վարի Ռուսաստանի հետ, արդեն գտնվում է Բելառուսի տարածքում, հայտնում է Sputnik Բելառուսը։

«Ուկրաինական պատվիրակությունն արդեն Բելառուսի տարածքում է՝ բանակցությունների վայրին մոտ։ Սպասվում է, որ ռուս բանակցողների հետ հանդիպումը կսկսվի մոտակա ժամերին»,-ասված է գործակալության հաղորդագրության մեջ:

Ավելի վաղ ՌԴ նախագահի օգնական Վլադիմիր Մեդինսկին հայտարարել էր, որ Ուկրաինան համաձայնել է բանակցություններ անցկացնել Բելառուսի Գոմելի մարզում, որտեղ մեկնել է ռուսական պատվիրակությունը: Ռուսաստանի նախագահի մամուլի քարտուղար Դմիտրի Պեսկովը նշել էր, որ դրան նախորդել է Ալեքսանդր Լուկաշենկոյի եւ Վլադիմիր Զելենսկու հեռախոսազրույցը:

Նշենք, որ երեկ` փետրվարի 27–ին, Ուկրաինայի նախագահ Վլադիմիր Զելենսկին հրաժարվել էր Բելառուսում բանակցել ռուսական կողմի հետ` ասելով, որ բանակցային հարթակ կարող են դառնալ Վարշավան, Բուդապեշտը, Ստամբուլը, Բաքուն, բայց ոչ Բելառուսի տարածքը։

Ուկրաինայի նախագահը նաև նշել է, որ Բելառուսի Գոմել քաղաքը` որպես բանակցային տարածք, ընտրել է ոչ թե բելառուս ժողովուրդը, այլ Ռուսաստանի ղեկավարությունը։

Ռուսական կողմը Ուկրաինային մինչև 15։00 ժամանակ էր տվել` բանակցությունների առաջարկին արձագանքելու։

Ավելի ուշ հայտնի դարձավ, որ Ուկրաինան համաձայնել է ՌԴ–ի հետ բանակցություններ վարել Բելառուսում, Գոմելի շրջանում։

Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։

Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: