ԵՐԵՎԱՆ, 27 փետրվարի – Sputnik. Ուկրաինան համաձայնել է ՌԴ–ի հետ բանակցություններ վարել Բելառուսում, Գոմելի շրջանում։ Այսօր լրագրողներին հայտնել է պատվիրակության ղեկավար, ՌԴ նախագահի օգնական Վլադիմիր Մեդինսկին, ով արդեն մի քանի ժամ գտնվում է Գոմելում` սպասելով ուկրաինական կողմի պատվիրակության արձագանքին։
«Մենք արդեն պատրաստվում էինք մեկնել Գոմելից, բայց ուկրաինական կողմից տեղեկություն ստացանք բանակցությունների հաստատման մասին, որոնք կանցկացվեն հենց այստեղ։ Հիմա մշակվում է երթուղին, ընտրվում է առավել արդյունավետ տեղը, որտեղ ապահովված կլինի առավելագույն անվտանգություն ուկրաինական կողմի համար։ Մենք երաշխավորում ենք ուկրաինական կողմի երթուղում 100-տոկոսանոց անվտանգությունը ու որոշված տեղում կսպասենք ուկրաինական պատվիրակությանը»,- լրագրողների հետ զրույցում հայտնել է ռուսաստանյան պատվիրակության ղեկավար, ՌԴ նախագահի օգնական Վլադիմիր Մեդինսկին։
Նա ասել է, որ բանակցությունների հստակ ժամ հայտնի չէ, վստահեցրել է, որ ռուսական կողմը պատրաստ է սպասել` միաժամանակ հիշեցնելով, որ յուրաքանչյուր ժամի արժեքը մարդկային կյանքեր են` խաղաղ բնակիչների և ուկրաինացի զինվորների։
Հիշեցնենք` ՌԴ նախագահի մամուլի քարտուղար Դմիտրի Պեսկովը հայտնել էր, որ ռուսական պատվիրակությունը ժամանել է Բելառուս և Գոմելում պատրաստ սպասում է ուկրաինացիների հետ բանակցություններ սկսելուն։
Ուկրաինայի նախագահ Վլադիմիր Զելենսկին հրաժարվել էր Բելառուսում բանակցել ռուսական կողմի հետ` ասելով, որ բանակցային հարթակ կարող են դառնալ Վարշավան, Բուդապեշտը, Ստամբուլը, Բաքուն, բայց ոչ Բելառուսի տարածքը։
Ուկրաինայի նախագահը նաև նշել է, որ Բելառուսի Գոմել քաղաքը` որպես բանակցային տարածք, ընտրել է ոչ թե բելառուս ժողովուրդը, այլ Ռուսաստանի ղեկավարությունը։
Ռուսական կողմը Ուկրաինային մինչև 15։00 ժամանակ էր տվել` բանակցությունների առաջարկին արձագանքելու։
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: