ԵՐԵՎԱՆ, 27 փետրվարի - Sputnik. Թուրքիայի ԱԳՆ Մևլութ Չավուշօղլուն CNN Türk հեռուստաընկերության եթերում ասել է, որ Թուրքիան կարող է փակել Բոսֆորի և Դարդանելի նեղուցները՝ Ուկրաինայի և Ռուսաստանի նավերի համար։
Նա ընդգծել է, որ Ափամերձ և ոչ ափամերձ երկրների ռազմանավերի անցման վերաբերյալ կարգավորումն արվում է Մոնտրյոյի պայմանագրով: «Այս պայմաններում էլ մենք Մոնտրյոյի պայմանագիրը կիրառելու ենք: Համաձայնագիրը ենթադրում է, որ երբ կա պատերազմ, բայց Թուրքիան պատերազմի կողմ չէ, այն կարող է նեղուցները փակել պատերազմող կողմերի համար»,–ասել է նա:
Չավուշօղլին նշել է, որ այստեղ այլ հարց է կարևոր. սա պատերա՞զմ է, հակամարտությո՞ւն է, թե՞ ռազմական գործողություն: «Նախ եղավ Ռուսաստանի հարձակումը: Մենք մեր մասնագետների, զինվորականների, իրավաբանների հետ սա քննարկեցինք` սա արդեն պատերազմի է վերածվել: Այս պարագայում մենք կողմերից որն ուզում է լինել` Ռուսաստանն էլ կարող է լինել, Ուկրաինան էլ, կարող ենք կիրառել Մոնտրյոյի համաձայնագիրը»,–ասել է Թուրքայի ԱԳ նախարարը: Նա ընդգծել է, որ ոմանք սխալ են մեկնաբանում: Պայմանագրի 19-րդ կետը մեկ բացառություն ունի. եթե մի ռազմանավ գնում է պատերազմի կողմերից մեկը հանդիսացող երկրի ռազմաբազային պատկանող նավահանգիստ, այդ դեպքում նրա անցումը չի կարող արգելափակվել:
«Այս պահին Միջերկրական ծովում կան Ռուսաստանի Սևծովյան ռազմաբազաներին պատկանող ռազմանավեր, դա պարզ է: Ու որևէ խախտում չպետք է լինի: Ու նաև չպետք է ռազմանավը ասի «ռազմաբազա եմ գնում», նեղուցն անցնի ու գնա մասնակցի պատերազմի: Մենք Մոնտրյոյի համաձայնագրի կետերն այսպես հստակ ենք կիրառելու»,–նշել է Չավուշօղլուն։
Ավելի վաղ Չավուշօղլուն հայտնել էր, որ Թուրքիան բոլորին տեսանելի կերպով կկատարի Մոնտրյոյի կոնվենցիայի բոլոր դրույթները։
Մոնտրյոյի կոնվենցիան ընդունվել է 1936 թվականին։ Այն սահմանում է առևտրային նավերի համար խաղաղ և պատերազմական ժամանակներում նեղուցներով ազատ անցումը։ Արտակարգ իրավիճակներում Թուրքիան իրավունք ունի արգելել կամ սահմանափակել զինվորականների մուտքը Բոսֆորի և Դարդանելի տարածքով։
Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: