ԵՐԵՎԱՆ, 26 փետրվարի – Sputnik. Ռուսական տնտեսական ու ֆինանսական համակարգի ղեկավարությունը, սթափ գնահատելով «պատժամիջոցային ցասումը», որում գտնվում են շատ արևմտյան քաղաքական գործիչներ, ժամանակին ձեռնարկել են համապատասխան հակաքայլեր: «Արմենպրեսի» հետ զրույցում նման կարծիք է հայտնել Հայաստանում Ռուսաստանի դեսպան Սերգեյ Կոպիրկինը` պատասխանելով հարցին, թե Ռուսաստանի հանդեպ պատժամիջոցներն ու ռուսական արժույթի արժեզրկումն ինչպիսի ազդեցություն կարող են ունենալ հայ-ռուսական տնտեսական հարաբերությունների վրա։
Կոպիրկինը նշել է, որ Ռուսաստանը չի ճանաչում միակողմ պատժամիջոցները. ՌԴ–ն դրանք համարում է անօրինական և միազգային իրավունքի ոգուն ու տառին հակասող, համաձայն որի՝ հարկադրանքի մեթոդներ կարող է ձեռնարկել միայն ՄԱԿ-ի Անվտանգության խորհուրդը։ Միաժամանակ, ՌԴ–ն հակաքայլեր է ձեռնարկել պատժամիջոցների համար։
«Կայուն բանկեր, առևտրային և ֆինանսական տեղեկատվության փոխանակման համակարգեր, ներմուծման փոխարինման ակտիվ աշխատող ծրագիր. շատ բան է արվել տարիների ընթացքում՝ այն պահից ի վեր, երբ արևմտյան գործընկերներն առաջին անգամ պատկերացրին, թե ի զորու են ստիպել մեզ պատժամիջոցների ճանապարհով հրաժարվել սեփական ազգային շահերը պաշտպանելու սուվերեն իրավունքից»,–ասել է նա։
ՌԴ դեսպանը հիշեցրել է, որ Վաշինգտոնի կողմից վերջերս ընդունած պատժամիջոցների փաթեթը «հետհոբելյանական» 101-րդն էր։
Կոպիրկինի խոսքով` մշակված գործիքակազմը վերաբերում է նաև օտարերկրյա գործընկերների հետ առևտրատնտեսական հարաբերությունների պաշտպանությանը, հատկապես նրանց հետ, ում ՌԴ–ին միավորում է ընդհանուր ինտեգրացիոն մեխանիզմները։
Նա խորհրդանշական է համարել, որ «պատժամիջոցների ցասման» նոր փուլը համընկել է Ղազախստանում Եվրասիական միջկառավարական խորհրդի հերթական հաջող նիստի հետ։
Այնտեղ, մասնավորապես, ՌԴ վարչապետ Միխայիլ Միշուստինը հայտարարել է նոր ինտեգրացիոն նախագծի՝ «Եվրասիական ագրոէքսպրես»-ի մասին, որը նախատեսված է մասնակից երկրների միջև պարզեցնելու և արագացնելու լոգիստիկ ընթացակարգերը գյուղատնտեսական ապրանքների առևտրի մեջ:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան:
ԱՄՆ նախագահ Ջո Բայդենը դրանից հետո հայտարարեց Ռուսաստանի դեմ պատժամիջոցների մասին։
Փետրվարի 24–ին ԱՄՆ-ն նոր պատժամիջոցներ սահմանեց ռուսական մի քանի բանկերի դեմ։ Պատժամիջոցների մասին են հայտարարել նաև Կանադան, Մեծ Բրիտանիան, Եվրամիությունը։ Պատժամիջոցներ կկիրառեն նաև ՌԴ նախագահ Վլադիմիր Պուտինի և արտգործնախարար Սերգեյ Լավրովի դեմ։