Թուրքիան ճագարային քաղաքականություն է վարում` թռչկոտում է մի կողմից մյուս կողմը, ուզում է և՛ իր ունեցած դիրքերը պահպանել Ուկրաինայում, և՛ իր հարաբերությունները չփչացնել Ռուսաստանի հետ։ Sputnik Արմենիայի եթերում, խոսելով Ուկրաինայի և Ռուսաստանի հանդեպ հիմա Թուրքիայի ընդունած դիրքորոշումից, նման կարծիք հայտնեց թուրքագետ Մհեր Աբրահամյանը։
«Նախ ասում են, որ ՌԴ գործողությունները հակասում են միջազգային բոլոր իրավունքներին և անընդունելի են, հետո` որ ՌԴ-ի հետ բարեկամական, տնտեսական, սոցիալական լավ հարաբերությունների մեջ են։ Թուրքական հին ու «բարի» դիվանագիտությունն է` փորձելով են գտնել իրենց համար նպաստավոր իրավիճակ և հասկանալ` ում կողմն են բռնելու»,–այսպես մեկնաբանեց Թուրքիայի քաղաքականությունն Աբրահամյանը։
Ըստ թուրքագետի, Էրդողանը կաշկանդված է ՆԱՏՕ-ի անդամ լինելով, քանի դեռ ՆԱՏՕ–ն չի խառնվել, Էրդողանը հանգիստ կլինի։
Աբրահամյանը նաև շեշտեց, որ չնայած ռուս–թուրքական նորմալ հարաբերություններին, Թուրքիան Ռուսաստանի համար պատմության ընթացքում երբեք էլ վստահելի երկիր չի եղել, հաճախ են Թուրքիայի կողմից խախտվել երկկողմ համաձայնությունները։ Թուրքագետը հավելեց` եթե Թուրքիան վստահելի չէ Ռուսաստանի համար, ապա մեր համար անվստահելի ու դրանից վեր է։ Նրա հետ այս պարտված, այս ջախջախված վիճակում դիվանագիտությամբ մտնել որևէ թեմայի մեջ` սխալ է։
Հիշեցնենք` Թուրքիայի նախագահ Ռեջեփ Թայիփ Էրդողանը փետրվարի 24-ին Անկարայում հրավիրել էր Անվտանգության խորհրդի նիստ Ռուսաստանի ռազմական գործողության քննարկման համար։ ԱԽ նիստից հետո Էրդողանը հայտարարեց, որ Թուրքիան չի ընդունում և մերժում է Ռուսաստանի սկսած գործողությունը ու կոչ է անում կողմերին խնդիրը լուծել Մինսկի համաձայնությունների շրջանակներում երկխոսելով։