ԵՐԵՎԱՆ, 25 փետրվարի – Sputnik. Թուրքիայի արտգործնախարար Մևլյութ Չավուշօղլուն` մեկնաբանելով ռուսական նավերի համար նեղուցները «փակելու» կոչերը, հայտարարել է, որ Անկարան կատարելու է Մոնտրյոյի համաձայնագիրը բոլոր հոդվածներով` երկակի ստանդարտների մեջ չընկնելով։ Այս մասին հայտնել է ՌԻԱ Նովոստին։
Ավելի վաղ Թուրքիայում Ուկրաինայի դեսպան Վասիլի Բոնդարը հայտարարել էր, որ Կիևն Անկարայից պահանջում է ռուսական նավերի համար փակել Բոսֆորի և Դարդանելի նեղուցները։ Թուրքիայի արտգործնախարար Մևլյութ Չավուշօղլուն հայտարարել էր, որ Թուրքիան կարող է փակել նեղուցները, բայց ռուսական կողմը իրավունք կունենա իր նավատորմը բազա վերադարձնել։
«Մենք կատարելու ենք Մոնտրյոյի համաձայնագիրը բոլոր հոդվածներով։ Մենք կատարելու ենք այն, ինչպես նախկինում, բառացիորեն երկակի ստանդարտների մեջ չընկնելով», – Չավուշօղլուի խոսքերն է մեջբերում «Անադոլու» գործակալությունը։
Մոնտրյոյի կոնվենցիան ընդունել են 1936 թվականին։ Այն առևտրային նավերին իրավունք է տալիս ազատ անցում կատարել նեղուցներով ինչպես խաղաղ, այնպես էլ պատերազմի ժամանակ, սակայն ռեժիմները բոլորի համար տարբեր են։ Միևնույն ժամանակ փաստաթուղթը սահմանափակում է Սև ծովում ոչ սևծովյան պետությունների ռազմական նավերի ներկայությունը երեք շաբաթով։ Արտակարգ իրավիճակներում Թուրքիան իրավունք ունի արգելել կամ սահմանափակել Բոսֆորով և Դարդանելով զինվորականների անցումը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: