ԵՐԵՎԱՆ, 25 փետրվարի – Sputnik. Հայաստանի և Ռուսաստանի պաշտպանության նախրարությունների միջև պաշտպանական համագործակցությունը կշարունակի զարգանալ։ Ասել է ՀՀ պաշտպանության նախարար Սուրեն Պապիկյանը` փետրվարի 25-ին Մոսկվայում իր ռուսաստանցի պաշտոնակից Սերգեյ Շոյգուի հետ հանդիպման ժամանակ։
«Կարող եմ վստահեցնել, որ կանեմ հնարավոր ամեն ինչ հայ-ռուսական պաշտպանական համագործակցությունն էլ ավելի ամրապնդելու համար»,- ՌԻԱ Նովոստիի փոխանցմամբ ասել է Պապիկյանը։
Միաժամանակ, ՀՀ ռազմական գերատեսչության ղեկավարը շեշտել է, որ լարվածության ընդհանուր նվազում այսօր էլ չի նկատվում, ու ամեն անգամ ստիպված ենք լինում դիմակայել նոր մարտահրավերների ու սպառնալիքների։
«Ակնհայտ է, որ մեր պետությունների առջեւ ծառացած այս բոլոր մարտահրավերներն ու սպառնալիքները հնարավոր է հաղթահարել միայն միասնաբար գործելով»,- ասել է Պապիկյանը։
Հայաստանի և Ռուսաստանի պաշտպանության նախարարներ Սուրեն Պապիկյանի և Սերգեյ Շոյգույի հանդիպումը (25 փետրվարի, 2022թ)․Մոսկվա
© Photo : official site of MoD of RF
Այդ համատեքստում ՀՀ պաշտպանության նախարարը հատկապես կարևորել է դաշնակից պետությունների պաշտպանական գերատեսչությունների ղեկավարների մակարդակով հանդիպումները։
Հանդիպման ավարտին Պապիկյանը Շոյգուին հրավիրել է պաշտոնական այցով ժամանել Հայաստան: Նույն օրը, Հայաստանի պաշտպանական գերատեսչության ղեկավարը ծաղկեպսակ է դրել Անհայտ զինվորի հուշահամալիրին: