ԵՐԵՎԱՆ, 25 փետրվարի – Sputnik. ԱՄՆ-ը պատժամիջոցներ է սահմանել ռուսական ևս մի քանի բանկերի դեմ՝ կապված Ուկրաինայի դեմ ՌԴ ԶՈւ ռազմական գործողության հետ։ Ավելի վաղ ԱՄՆ նախագահ Ջո Բայդենը հայտարարել էր Ռուսաստանի բանկի և ՎՏԲ-ի դեմ կիրառված պատժամիջոցների մասին։
Նոր սահմանափակումներն ազդել են Սբերբանկի, Գազպրոմբանկի, «Օտկրիտիե»-ի, «Նովիկոմբանկ»–ի և «Սովկոմբանկ»-ի վրա:
Մասնավորապես, ըստ ՌԻԱ Նովոստիի, ԱՄՆ գանձապետարանը կարգադրել է ամերիկյան բոլոր ֆինանսական հաստատություններին 30 օրվա ընթացքում փակել Սբերբանկի թղթակցային հաշիվները։ Սբերբանկի կողմից դոլարով բոլոր վճարումները, որոնք բանկը կփորձի կատարել իր հաճախորդների համար, կմերժվեն, երբ նրանք մուտք գործեն ամերիկյան բանկեր:
Պատժամիջոցների մեկ այլ բլոկ վերաբերում է ռուսական ընկերությունների համար պարտքերի/բաժնետոմսերի թողարկման միջոցով կապիտալ ներգրավելու արգելքին։ Նման պատժամիջոցների տակ են «Գազպրոմը», «Գազպրոմբանկը», «Գազպրոմնեֆտը», «Տրանսնեֆտը», «Ռոսսելխոզբանկը», «Ռոստելեկոմը», «Ռուսհիդրոն», «Ալռոսան», «Սովկոմֆլոտը» և «Ռուսական երկաթուղիները»:
Փետրվարի 24-ին, վաղ առավոտյան Ռուսաստանի նախագահ Վլադիմիր Պուտինը հայտարարել է, որ որոշում է կայացրել Ուկրաինայի նկատմամբ հատուկ ռազմական գործողության մասին: Ռուսաստանցիներին ուղղված հեռուստաուղերձում նա հայտարարել է, որ հանգամանքները պահանջում են վճռական և անհապաղ գործողություններ, Դոնբասի Ժողովրդական Հանրապետությունը դիմել է Ռուսաստանին` օգնության խնդրանքով:
Ռուսաստանի նախագահի խոսքով՝ արյունահեղության ողջ պատասխանատվությունը կրելու է Ուկրաինայում իշխող ռեժիմը: Նա կոչ է արել ուկրաինացի զինվորականներին չկատարել ուկրաինական իշխանությունների հանցավոր հրամանները, վայր դնել զենքը և գնալ տուն:
Ավելի ուշ ՌԴ ՊՆ-ն ընդգծել է, որ Ռուսաստանի Զինված ուժերը ոչ մի հրթիռային, ավիացիոն կամ հրետանային հարվածներ չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: Նախարարությունում վստահեցրել են, որ քաղաքացիական բնակչությանը ոչինչ չի սպառնում։