ԵՐԵՎԱՆ, 25 փետրվարի – Sputnik. Եվրոպայի Խորհրդի նախարարների կոմիտեն որոշում է կայացրել դադարեցնել կառույցում ՌԴ-ի ներկայացուցչության իրավունքը, նշված է ԵԽ կայքում։
Այսօր ընդունված որոշումը նշանակում է, որ Ռուսաստանի Դաշնությունը մնում է Եվրոպայի խորհրդի անդամ և Եվրոպայի Խորհրդի համապատասխան կոնվենցիաների մասնակից, ներառյալ՝ Մարդու իրավունքների եվրոպական կոնվենցիան։ Կասեցված պետությունը չի մասնակցում նախարարների կոմիտեի, Խորհրդարանական վեհաժողովի և այլ մարմինների աշխատանքներին (այս դրույթը չի անդրադառնում ՄԻԵԴ-ին)։
Ռուսաստանի Դաշնության կողմից Մարդու իրավունքների եվրոպական դատարան ընտրված դատավորը նույնպես դատարանի անդամ է մնում, իսկ Ռուսաստանի Դաշնության դեմ ներկայացված բողոքները նախկինի պես կքննվեն, ու դատարանը դրանց վերաբերյալ որոշումներ կկայացնի:
Պետդումայի ԱՊՀ գործերով կոմիտեի առաջին փոխնախագահ Կոնստանտին Զատուլինը «Подъем» պարբերականին հայտարարել է, որ այս կազմակերպության անդամակցության կասեցումը քաղաքացիներից շատերի համար մեծ թեթևացում կլինի։
«Եվրոպայի Խորհրդին անդամակցելը Ռուսաստանի վրա մահապատժից հրաժարվելու պարտավորություն էր դնում։ Իսկ այժմ այդ պարտավորությունը դադարում է գոյություն ունենալ։ Դա ուրախալի չէ, սակայն ես համոզված եմ, որ ՌԴ քաղաքացիների 99,9%–ը որևէ կերպ չի կապում իր բարեկեցությունը ԵԽ–ում անդամակցության հետ»,-ասել է նա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ որոշում է կայացրել Ուկրաինայի նկատմամբ հատուկ ռազմական գործողության մասին, քանի որ ԼԺՀ-ի և ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները պահանջում են վճռական և անհապաղ գործողություններ։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան:
Փետրվարի 25-ի առավոտվա դրությամբ շարքից հանվել է 118 ուկրաինական ռազմական օբյեկտ, Չեռնոբիլի ԱԷԿ-ը հսկողության տակ է վերցվել։ Ուկրաինայի ՀՕՊ միջոցները ճնշվել են, ռազմական ավիաբազայի ռազմական ենթակառուցվածքը շարքից դուրս է բերվել, նշում է Պաշտպանության նախարարությունը: