Կանադան և Մեծ Բրիտանիան նոր պատժամիջոցներ են սահմանել Ռուսաստանի դեմ

ԵՐԵՎԱՆ, 24 փետրվարի – Sputnik. Կանադան և Մեծ Բրիտանիան նոր պատժամիջոցներ են սահմանել Ռուսաստանի դեմ՝ Ուկրաինայում ստեղծված իրավիճակի պատճառով, հաղորդում է ՌԻԱ Նովոստին։

Ինչպես ասել է Կանադայի վարչապետ Ջասթին Թրյուդոն, նոր սահմանափակումներն ազդում են մի շարք խոշոր ռուսական բանկերի վրա, նաև առանց հապաղելու արտահանման սահմանափակումներ են մտցվում։

Իր հերթին Մեծ Բրիտանիան պատժամիջոցներ է սահմանել ռազմարդյունաբերական համալիրի մի շարք ռուսական պետական կորպորացիաների դեմ։

Վարչապետ Բորիս Ջոնսոնը, ելույթ ունենալով խորհրդարանում, ասել է, որ Լոնդոնն արգելում է «Աերոֆլոտին» գործել Մեծ Բրիտանիայում։

Նոր ցուցակում են հայտնվել «Ռոստեխը», «Միացյալ ավիաշինական կորպորացիան», «Միավորված նավաշինարարական կորպորացիան», «Մարտավարական հրթիռային սպառազինություն» կորպորացիան, «Ուրալվագոնզավոդը», ՎՏԲ-ն և «Աերոֆլոտ» ավիաընկերությունը:

Նշենք, որ այսօր բրիտանական իշխանությունները պատժամիջոցների ցուցակում ներառել են ռուսական հինգ բանկերի և երեք գործարարների։

Փետրվարի 24-ին, վաղ առավոտյան Ռուսաստանի նախագահ Վլադիմիր Պուտինը հայտարարել է, որ որոշում է կայացրել Ուկրաինայի նկատմամբ հատուկ ռազմական գործողության մասին: Ռուսաստանցիներին ուղղված հեռուստաուղերձում նա հայտարարել է, որ հանգամանքները պահանջում են վճռական և անհապաղ գործողություններ, Դոնբասի Ժողովրդական Հանրապետությունը դիմել է Ռուսաստանին` օգնության խնդրանքով:

Ռուսաստանի նախագահի խոսքով՝ արյունահեղության ողջ պատասխանատվությունը կրելու է Ուկրաինայում իշխող ռեժիմը: Նա կոչ է արել ուկրաինացի զինվորականներին չկատարել ուկրաինական իշխանությունների հանցավոր հրամանները, վայր դնել զենքը և գնալ տուն:

Ավելի ուշ ՌԴ ՊՆ-ն ընդգծել է, որ Ռուսաստանի Զինված ուժերը ոչ մի հրթիռային, ավիացիոն կամ հրետանային հարվածներ չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: Նախարարությունում վստահեցրել են, որ քաղաքացիական բնակչությանը ոչինչ չի սպառնում։