ԵՐԵՎԱՆ, 24 փետրվարի – Sputnik. Ռուսաստանի նախագահ Վլադիմիր Պուտինն Ուկրաինայի դեմ ռազմական գործողությունը հարկադրված միջոց է անվանել։ Նրա խոսքով ՝ Ռուսաստանին այլ կերպ վարվելու ոչ մի շանս չեն թողել։
«Անվտանգության ոլորտում այնպիսի ռիսկեր էին ստեղծել, որ այլ միջոցներով արձագանքելն անհնար էր։ Բոլոր փորձերը զրոյական արդյունք տվեցին։ Անկեղծ ասած, ես նույնիսկ զարմացած եմ։ Ոչ մի հարցով ոչ մի միլիմետր առաջ չշարժվեցին»,- ասել է Պուտինը գործարար շրջանակների ներկայացուցիչների հետ հանդիպման ժամանակ։
Նա նշել է, որ ապագայում առաջացած անխուսափելի ռիսկերը կվտանգեին նույնիսկ Ռուսաստանի գոյությունը։ Միևնույն ժամանակ, Ռուսաստանում բոլորը հասկացել են դրա հետ կապված ռիսկերը և պատրաստվել են սահմանափակումներին և պատժամիջոցներին։ Ռուսաստանը, ըստ Պուտինի, մնում է համաշխարհային տնտեսության մաս և չի պատրաստվում վնասել այդ համակարգին։ Պուտինը հորդորել է օտարերկրյա գործընկերներին «Ռուսաստանին դուրս չմղել այդ համակարգից»։
Այնուամենայնիվ, կլինեն սահմանափակումներ։ Պուտինը կարծում է, որ ռուսական բիզնեսը պետք է ըմբռնումով վերաբերվի տեղի ունեցողին և համերաշխորեն աշխատի կառավարության հետ՝ փնտրելով այն գործիքները, որոնք կաջակցեն արտադրությանը, տնտեսությանը և աշխատատեղերին:
Ռուսաստանի նախագահ Վլադիմիր Պուտինը փետրվարի 21-ին դիմեց ռուսաստանցիներին և հայտարարեց ԼԺՀ-ի և ԴԺՀ-ի ինքնիշխանությունը ճանաչելու իր որոշման մասին:
Վլադիմիր Պուտինը փետրվարի 24–ին հայտարարեց, որ որոշում է կայացրել Դոնբասում հատուկ ռազմական գործողության մասին։