ԵՐԵՎԱՆ, 23 փետրվարի – Sputnik. ՀՀ պաշտպանության փոխնախարար Արման Սարգսյանը ոչ հերքեց, և ոչ էլ հաստատեց Սյունիքի մարզում՝ Փայլասարում և Քաչալսարում ադրբեջանական զորքերի հետ քաշվելու մասին լուրը։
Լրագրողների հետ ճեպազրույցում Սարգսյանը նշեց, որ նման տեղեկատվություն հայտնելու կարիք եթե լինի, ապա կհայտնվի ՊՆ մամուլի ծառայության տարածած հաղորդագրություններում։
Նշենք, որ օրերս Կապան խոշորացված համայնքի ղեկավարը հայտնել էր այդ մասին ու ընդգծել, որ առնվազն 20 օր թշնամու զորք չի տեղակայվել այդ հատվածում։
Անդրադառնալով հարցին, թե ինչու ՀՀ զինված ուժերը կրկին չեն տեղակայվում իրենց դիրքերում, նա շեշտեց. «Ցանկալի չէ զինված ուժերի տեղաշարժերի, դիրքերի վերաբերյալ նման բաց հանրային քննարկումներ ծավալել։ Խնդրում եմ քիչ խոսել մեր զինված ուժերի և անվտանգային խնդիրների մասին»,– նշեց Արման Սարգսյանը։
Նա միայն ասաց, որ ի ուրախություն Հայաստանի, չնայած ադրբեջանական կողմն անընդհատ տարածում է տեղեկություն, թե հայկական կողմը սադրանքի է դիմում, սակայն սահմանին հարաբերական անդորր է։
Հիշեցնենք, որ դեռ 2021 թվականի հոկտեմբեր ամսին լուրեր էին սկսել շրջանառվել, թե Կապանի Փայլասարը հանձնել են Ադրբեջանին։ Լուրը հաստատել էր Կապանի համայնքապետ Գևորգ Փարսյանը, իսկ հոկտեմբերի 18-ին ԱԱԾ–ն հերքել էր այդ լուրը` ասելով, որ ՀՀ սահմանապահ զորքերը շարունակում են իրականացնել պետական սահմանի պահպանությունը նշված հատվածում։