ԵՐԵՎԱՆ, 23 փետրվարի – Sputnik. Հայաստանն առայժմ ուսումնասիրում է երեկ Մոսկվայում Ռուսաստանի ու Ադրբեջանի միջև ստորագրված համագործակցության հռչակագիրը, որից հետո կարձագանքի դրան։
Այս մասին այսօր լրագրողների հետ զրույցում հայտնեց ՀՀ ԱԺ նախագահի ԺՊ Հակոբ Արշակյանը։
«Դեռ որևէ արձագանք չկա։ Տեքստը հավուր պատշաճի կուսումնասիրվի, որից հետո արձագանքը չի ուշանա»,– ասաց Արշակյանը։
Ինչ վերաբերում է նախնական գնահատականին, ԱԺ փոխնախագահը նշեց, որ նման փաստաթղթերի ստորագրումը տվյալ երկրների սուվերեն իրավունքն է։
«Յուրաքանչյուր երկրի իրավունքն է իր միջազգային հարաբերությունները զարգացնել այնպես, ինչպես ինքն է հարմար գտնում»,– ասաց Արշակյանը։ Նա հիշեցրեց, որ Հայաստանը ՌԴ–ի հետ ևս ունի ռազմավարական գործընկերության մասին պայմանագիր։
«Թե՛ Ադրբեջանը, թե՛ Ռուսաստանը, թե՛ Իրանը, թե՛ Հայաստանը սուվերեն երկրներ են, և իրենց սուվերեն իրավունքն արտաքին հարաբերություներում կատարում են իրենց շահերից ելնելով։ Հիմա, եթե դուք կարծում եք, որ Հայաստանը կարող է իր որևէ գործողությամբ ազդել նմանատիպ գործընթացների վրա, ես կարծում եմ, որ պետք չէ գերագնահատել այդ բոլոր իրադարձությունները»,- ասաց Արշակյանը։
Հիշեցնենք` փետրվարի 23-ին Մոսկվայում Ռուսաստանի և Ադրբեջանի նախագահներ Վլադիմիր Պուտինը և Իլհամ Ալիևը դաշնակցային փոխգործակցության մասին հռչակագիր էին ստորագրել, որը ներառում է երկու երկրների ԶՈւ–ների միջև օպերատիվ ու մարտական պատրաստության համատեղ միջոցառումների անցկացում, երկկողմանի ռազմական համագործակցության այլ ուղղությունների զարգացում։
Հռչակագիրը նախատեսում է փոխգործակցություն ժամանակակից սպառազինությամբ և ռազմական տեխնիկայով համալրելու հարցերում, ինչպես նաև տվյալ ոլորտի այլ ուղղություններով։