ԵՐԵՎԱՆ, 23 փետրվարի – Sputnik. ՀՀ մարդու իրավունքների պաշտպան Արման Թաթոյանը հայտնում է, որ քիչ առաջ ևս մեկ դիմում է ներկայացրել Սահմանադրական դատարան։ Թաթոյանը ֆեյսբուքյան իր էջում է նման գրառում արել` հայտնելով այդ մասին։
Այսօր Թաթոյանն արդեն իսկ մեկ դիմում ներկայացրել էր՝ վիճարկելով ՀՀ քաղաքացիական ծառայության համակարգի օրենսդրությունը։
«Քիչ առաջ դիմել եմ Սահմանադրական դատարան. վիճարկում եմ այն, որ Բարձրագույն դատական խորհրդում բացակայում է դատավորին կարգապահական պատասխանատվության ենթարկելու հստակ և կանխատեսելի ընթացակարգ։ Այդ թվում՝ գոյություն չունի կարգապահական պատասխանատվության ենթարկելու որոշումը բողոքարկելու իրավունք»,–գրել է Թաթոյանը։
Հավելենք, որ այսօր լրանում է Արման Թաթոյանի՝ ՄԻՊ պաշտոնում գտնվելու ժամկետը։