ԵՐԵՎԱՆ, 23 փետրվարի – Sputnik. Ռուսական խաղաղապահ զորախումբը Արցախի ղեկավարության կողմից բավական լուրջ վստահություն է վայելում։ Անհրաժեշտ է խաղաղապահների իրավասությունների ընդլայնման հարց բարձրացնել։ Այս մասին այսօր Sputnik Արմենիա մուլտիմեդիոն մամուլի կենտրոնում կայացած ասուլիսի ընթացքում ասաց Դեմոկրատական կուսակցության առաջնորդ Արամ Սարգսյանը։
Ավելի վաղ Սարգսյանը մի խումբ մտավորականների հետ Արցախ էր այցելել, որտեղ հանդիպում էր ունեցել նախագահ Արայիկ Հարությունյանի, ԱԽ քարտուղար Վիտալի Բալասանյանի և այլ պաշտոնյաների հետ։
«Իմ սեփական դիտարկումների հիման վրա կարող եմ ասել, որ ԼՂ ղեկավարությունը բավական բարձր վստահության ունի Ռուսաստանի և ռուս խաղաղապահների նկատմամբ։ Այնտեղ խաղաղ կյանք է հաստատվում, երեկոյան Ստեփանակերտի բոլոր պատուհաններում լույս է վառվում։ Մարդիկ ուզում են այնտեղ ապրել և պայքարել, և դա ամենակարևորն է մեզ համար», – ասաց Սարգսյանը։
Միևնույն ժամանակ քաղաքական գործիչը կարծում է, որ խաղաղապահ զարակազմի գործառույթներում անհրաժեշտ է որոշակի շտկումներ և լրացումներ կատարել։
Նրանք շատ լավ են կատարում իրենց աշխատանքը, սակայն չունեն ադրբեջանցիների կողմից հնարավոր հանցագործությունները կանխելու իրավասություն։
Արցախի բնակիչների դեմ նման գործողություններ ժամանակ առ ժամանակ ձեռնարկվում են, և, հայկական կողմը դա հաշվի առնելով, պետք է բարձրացնի խաղաղապահների իրավասությունների ընդլայնման հարցը։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: