ԵՐԵՎԱՆ, 22 փետրվարի – Sputnik. Հայաստան եկած ադրբեջանցի պատգամավորների կարծիքով` բոլոր հարցերը լուծված են, այդ թվում գերիների։ Լրագրողների հետ ճեպազրույցում ասաց Հայաստանի պատվիրակության անդամ Արթուր Խաչատրյանը։
Հայտնել էինք, որ «Եվրանեսթ» խորհրդարանական վեհաժողովի նիստին Երևան են ժամանել ադրբեջանցի պատգամավորներ Թահիր Միրկիշիլին և Սոլթան Մամեդովը: Նրանք արդեն հանդես են եկել ելույթով։
«Ադրբեջանցի պատգամավորների հետ որևէ խոսակցություն չի եղել, բայց Ադրբեջանի հետ խոսելու խնդիր մենք չունենք։ Չենք գնացել պաշտոնական ընթրիքի, քանի որ նրանց հետ հաց կիսելու ցանկություն չունենք»,–ասաց Խաչատրյանը։
Լրագրողները նշեցին, թե սովորաբար ՀՀ եկած պատվիրակություններին Ծիծեռնակաբերդի հուշահամալիր են տանում, արդյո՞ք հիմա էլ ՀՀ եկածներին տանելու են Ցեղասպանության զոհերի հիշատակին ծաղիկներ խոնարհելու։ Ի պատասխան Խաչատրյանը նշեց, որ նման բան նախատեսված չէ։
«Ծիծեռնակաբերդ այց չկա օրակարգում»,–ասաց Խաչատրյանը։
Նա հավելեց նաև, որ ՀՀ իշխանության հետ նախնական քննարկում դիրքորոշումների առնչությամբ նիստից առաջ չի եղել։
Հիշեցնենք, որ փետրվարի 22-ին Երևանում անցկացվում է «Եվրանեսթի» նիստերը։ Արևելյան գործընկերության երկրները ռոտացիայով են անցկացնում Եվրանեսթ խորհրդարանական վեհաժողովի նիստերը։ Հիմա հերթը Երևանինն է։
Նիստերին մասնակցելու համար Երևան են ժամանել նաև 2 ադրբեջանցի պատգամավոր` Թահիր Միրկիշիլին և Սոլթան Մամեդովը։