Խոցելի խմբերն այսուհետ մասնագիտացված աջակցություն կստանան. Արցախում կենտրոն բացվեց

ԵՐԵՎԱՆ, 22 փետրվարի – Sputnik․ Այսօր Մարտունի քաղաքում տեղի է ունեցել Արցախի սոցիալական զարգացման ու միգրացիայի նախարարության սոցիալ-հոգեբանական աջակցության առաջին կենտրոնի բացման արարողությունը։ Այստեղ սոցիալական աշխատանքի և հոգեբանական ծառայություններ են մատուցվելու խոցելի խմբերին։ Ուրախ լուրը Facebook-ի իր էջում հայտնել է ԱՀ պետնախարար Արտակ Բեգլարյանը։

«Այս կենտրոնն օրինակելի է ոչ միայն իր մոտեցումների ու նպատակների տեսանկյունից, այլ նաև, որ կառավարության և տարբեր մասնագիտական և բարեգործական կազմակերպությունների միջև տեղի է ունեցել բավականին լուրջ համագործակցություն»,- նշում է պետնախարարը։

Նրա խոսքով՝ աշխատանքները մեկնարկել են դեռ 1 տարի առաջ։ Տարբեր աջակիցների շնորհիվ հնարավոր է դարձել սոցիալական աշխատողների պատրաստման և վերապատրաստման ծրագրեր իրականացնել:

Արդյունքում մի քանի տասնյակ սոցիալական աշխատողներ ձեռք են բերել անհրաժեշտ գիտելիքներ։ Նրանցից մի քանիսն աշխատելու են հենց այս կենտրոնում:

Բեգլարյանը տեղեկացրել է, որ Մարտունիում կհիմնվի նաև երեխաների խնամքի ու զարգացման կենտրոն։

Կենտրոնների աշխատանքի շնորհիվ ոչ միայն վեր են հանվելու խոցելի խմբերի սոցիալ-հոգեբանական կարիքները, այլև աշխատանքներ են իրականացվելու դրանց բավարարմանն աջակցելու ուղղությամբ։

Մասնավորապես, պետնախարարի խոսքով՝ աշխատանքները նպատակաուղղված են լինելու խոցելի խմբերը ներկայացնող անձանց ակտիվացմանն ու ինքնուրույնության ապահովմանը: Նմանատիպ կենտրոններ են բացվելու նաև մյուս շրջաններում ու մայրաքաղաք Ստեփանակերտում։

Պետնախարարը խոստանում է, որ ոլորտում ինստիտուցիոնալ բարեփոխումները շարունակական են լինելու: