Ուզու՞մ եք սիրուն, ձնառատ ձմեռ տեսնել, ուրեմն եկեք Ապարան։ Ապարանյան ձմեռը հայտնի է խիստ ու ձնառատ լինելով, ձյան շերտը հաճախ պահպանվում է 3-4 ամիս։ Ապարանցիներն էլ մտածեցին ու որոշեցին իրենց ձմեռները զբոսաշրջային այցեքարտ դարձնել։ Երկարատև ընդմիջումից հետո արդեն 3-րդ տարին է` Ապարանի համայնքապետարանը վերականգնել է հին ավանդույթը։ «Ապարանյան ձմեռ» փառատոնն այս տարի անցկացվեց փետրվարի 20-ին քաղաքից ոչ հեռու՝ 2050-2200մ բարձրություն ունեցող Խաչասարի (Ապարան-Լուսագյուղ ճանապարհին) հատվածում։
Ձմեռային ուրախ փառատոնին մասնակցելու համար հյուրեր էին եկել Հայաստանի տարբեր կողմերից։ Երգ ու պար, ավանդական կերակրատեսակների հյուրասիրություն, խարույկ ու շատ խաղեր... Ձմեռային ավանդական մարզաձևերին զուգահեռ փառատոնի ընթացքում կազմակերպվեցին հեծանվավազք, ձիախաղեր, ռաֆտինգ, թռիչք պարապլանով, անցկացվեց նաև ձնամարտի առաջնություն։ Ձնամարտիկների թվում էր նաև Sputnik Արմենիայի թիմը։
Փառատոնի ընթացքում սիրողական խաղեր էլ անցկացվեցին՝ ձնեմարդ պատրաստելու, պարան ձգելու մրցույթ և այլն։ «Ապարանյան ձմեռն» ուրախ է անցնում, գնացեք Ապարան։