ԵՐԵՎԱՆ, 18 փետրվարի - Sputnik. Միջազգային օլիմպիական կոմիտեի (ՄՕԿ) նախագահ Թոմաս Բախը լրագրողներին հայտնել է, որ ռուսաստանցի գեղասահորդուհի Կամիլա Վալիևայի շրջապատի հետաքննությունը` նրա դրական դոփինգ-թեստի թեմայով, կանդրադառնա աղջկա մարզչական շտաբի վրա: Նրա խոսքերը մեջբերում է ՌԻԱ Նովոստին։
«Այո, Վալիևայի մարզիչի նկատմամբ հետաքննություն կլինի, մենք դրա անցկացումը լիովին վստահում ենք WADA-ին։ Այս իրավիճակի վրա լույս կսփռվի, որից հետո կձեռնարկվեն անհրաժեշտ միջոցներ։ Հնարավոր ամենախիստ միջոցները»,-ասել է Բախը մամուլի ասուլիսի ժամանակ։
Վալիևայի դոփինգ-թեստը, որը նա հանձնել էր դեկտեմբերի վերջին, դրական արդյունք է տվել։ Միջազգային օլիմպիական կոմիտեն (ՄՕԿ), Համաշխարհային հակադոփինգային գործակալությունը (WADA) և չմշկավազքի միջազգային միությունը (ISU) բողոք են ներկայացրել CAS-ին, այն մերժվել է: Գեղասահորդուհուն թույլ են տվել մասնակցել Պեկինի անհատական օլիմպիական մրցաշարին։ Թիմային մրցումների մրցանակակիրների պարգևատրման արարողությունը տեղի չի ունեցել։ Այն տեղի կունենա ռուս գեղասահորդուհու գործի հետաքննության ավարտից հետո, իսկ Վալիևայի արդյունքները Պեկինի օլիմպիադայում նախնական են համարվում: 2018-ի ամռանից Վալիևան պարապում է Էթերի Տուտբերիձեի խմբում:
Բախը, անդրադառնալով Վալիևայի հոգեբանական վիճակին, ասել է, որ մտահոգված է նրա ինքնազգացողությամբ «նման ելույթից ու նրա մարզիչների նման ընդունելությունից հետո»:
«Ի՞նչ կարող ենք անել հիմա։ Մենք օգտագործում ենք մեր բոլոր գործիքները՝ հոգեբանական օգնություն ենք առաջարկել մարզիկին։ Եվ մենք կապի մեջ ենք Ռուսաստանի օլիմպիական կոմիտեի հետ, որ նրան անհրաժեշտ օգնությունը ցուցաբերեն: Դա բոլորի շահերից է բխում», - ավելացրեց է Բախը։
Հիշեցնենք, որ կարճ ծրագրից հետո առաջատար Վալիևան երեկ չափազանց անհաջող հանդես եկավ ազատ ծրագրում՝ զրկվելով ոչ միայն ոսկե մեդալից, այլև ընդհանրապես պատվո հարթակին կանգնելուց։