ԵՐԵՎԱՆ, 18 փետրվարի – Sputnik. ՌԴ նախագահ Վլադիմիր Պուտինը հայտարարել է, որ Բելառուսի առաջնորդ Ալեքսանդր Լուկաշենկոյի հետ կառուցողական բանակցություններ են անցկացրել։ Տեղեկությունը հայտնում է ՌԻԱ Նովոստին։
Պուտին–Լուկաշենկո բանակցությունները կայացել են այսօր Կրեմլում, տևել են երկուսուկես ժամ։
Նախագահները նշել են, որ քննարկել են Ռուսաստանի և Բելառուսի խնդրահարույց հարցերը. դրանք քչանում են, բայց կան։
Դոնբասում տիրող իրավիճակը չէր կարող բանակցությունների թեմա չդառնալ, և Վլադիմիր Պուտինը նշել է, որ հենց հիմա Դոնբասում իրավիճակը սրվել է։
Լուկաշենկոն իր հերթին ասել է, որ տասնամյակների ընթացքում առաջին անգամ կանգնած են հակամարտության եզրին, որը կարող է ներառել ամբողջ մայրցամաքը: Նա նշել է` մարդիկ արդեն փախչում են Դոնբասից, և դա նորմալ չէ։
Միաժամանակ Վլադիմիր Պուտինն ասել է, որ ուշադրություն չի դարձրել Ուկրաինա «ռուսական ներխուժման» մասին տեղեկություններին, իսկ Լուկաշենկոն նշել է, որ Բելառուսը պատերազմ չի ուզում, բայց անհրաժեշտության դեպքում պատասխանը համաչափ կլինի։
«Արևմուտքն այնքան վրդովված է, որ Ռուսաստանը չի ներխուժել Ուկրաինա, որ հիմա սադրանքների համար նոր պատրվակ է փնտրում»,- ասել է Բելառուսի ղեկավարը։
Պուտինը շեշտել է, որ բանակցություններն անցել են գործնական և բարեկամական մթնոլորտում։ Ինչպես բազմիցս ընդգծել են երկու կողմերը, Ռուսաստանն ու Բելառուսը լավ հարևաններ են, ամենամոտ դաշնակիցները և ռազմավարական գործընկերները, որոնց միավորում են հոգևոր արժեքները, ընտանեկան կապերը, ընդհանուր պատմությունը: Երկկողմ գործակցությունը մշտապես կառուցված է փոխադարձ հարգանքի, աջակցության և միմյանց շահերը հաշվի առնելու սկզբունքների վրա։