ԵՐԵՎԱՆ, 17 փետրվարի – Sputnik. Սպորտային գործակալ, պրոդյուսեր Արի Զաքարյանը ցավում է, որ ռուս գեղասահորդուհի Կամիլա Վալիևան չկարողացավ իր կարողությունները լիովին ցուցադրել Պեկինի օլիմպիական խաղերում։ Նա իր տեսակետը հայտնել է ՌԻԱ Նովոստիին։
«Կամիլան այս օլիմպիական մրցաշարում գլխավոր ֆավորիտն էր, մեկը, ով չի պարտվել բացարձակապես ոչ մեկին: Շատերն ակնկալում էին, որ նա հանգիստ կհաղթի, այդպես էին մտածում և՛ փորձագետները, և՛ մարզասերները: Շատ եմ ցավում աղջկա համար։ Ես նրան մի քիչ ճանաչում եմ, գիտեմ, թե որքան փխրուն է։ Հիմա նրա համար ողբերգություն է եղել»,- ասել է Արի Զաքարյանը։
Ավելի վաղ հայտնել էինք, որ ռուս գեղասահորդուհի Աննա Շչերբակովան դարձավ Պեկինի օլիմպիական խաղերի չեմպիոն կանանց մենասահքում։ Երկրորդ տեղը զբաղեցրեց Ալեքսանդրա Տրուսովան, երրորդը՝ ճապոնացի Կաորի Սակամոտոն: Կարճ ծրագրից հետո Կամիլա Վալիևան գրավեց չորրորդ տեղը:
«Դժվար էր այս ամենից փախչել, շատ ծանր բեռ է, ես չեմ կարող որևէ մեկին մեղադրել, քանի որ պետք է իմանալ բոլոր նրբությունները և մանրամասները, ես չէ, որ պետք է դատեմ, թե ով է մեղավոր, ով՝ ոչ: Ես հավատում եմ, որ չկա մեկը, ով առանց կարեկցանքի վերաբերվի այս պատմությանը։ Կամիլան սուպերմարզիկ է։ Պետք է առաջ շարժվել, թող սա նրա համար պարզապես վատ երազ լինի»,- ասել է Զաքարյանը։
Հիշեցնենք՝ մարզական արբիտրաժային դատարանը (CAS) թույլատրել էր Վալիևային մասնակցել 2022 թվականի օլիմպիական խաղերի անհատական մրցումներին։ Այդուհանդերձ, նրա դոպինգի ստուգումները կշարունակվեն խաղերի ավարտից հետո։ Միջազգային օլիմպիական կոմիտեի գործադիր կոմիտեն հայտարարել էր, որ եթե Վալիևան հաղթի անհատական մրցումներում կամ եզրափակի լավագույն եռյակը, ապա մրցանակաբաշխություն չի կայանա։