ԵՐԵՎԱՆ, 17 փետրվարի- Sputnik.Դոնբասից ստացված տեղեկատվությունը տագնապալի է, Կիևի կողմից սադրանքներ են սկսվել։ Այս մասին, ՌԻԱ Նովոստիի փոխանցմամբ, հայտարարել է Ռուսաստանի նախագահի մամուլի քարտուղար Դմիտրի Պեսկովը։
Ավելի վաղ ինքնահռչակ Դոնեցկի և Լուգանսկի Ժողովրդական հանրապետությունների ներկայացուցիչները հայտարարել էին, որ Ուկրաինայի զինված ուժերը կրակ են բացել իրենց դիրքերի վրա: Ինչպես ասել է Հրադադարի ռեժիմի վերահսկման և համակարգման համատեղ կենտրոնում ԴԺՀ ղեկավարի ներկայացուցիչ Ռուսլան Յակուբովը, Կիևն անտեսում է Մինսկի համաձայնագրերը՝ կիրառելով ականանետեր և հրետանի:
Պեսկովը նշել է` ռուսական կողմը բազմիցս նախազգուշացրել է, որ Ուկրաինայի զինված ուժերի գերկենտրոնացումը սահմանագծի մոտ հնարավոր սադրանքների հետ միասին կարող է մեծ վտանգի բերել:
«Ահա հիմա տեսնում ենք, որ սկսվում են այդ սարսափելի սադրանքները, ստանում ենք ինքնահռչակ հանրապետությունների ներկայացուցիչներից հաղորդագրություններ, որ շփման գծում տեղի են ունենում փոխհրաձգություններ, որ առաջին հարվածները եկել են հենց Ուկրաինայի կողմից։ Սա մտահոգիչ տեղեկություն է, մենք շարունակում ենք հետևել իրադարձությունների զարգացմանը», - նշել է ՌԴ նախագահի մամուլի քարտուղարը։
Նա արձանագրել է, որ Դոնբասի շփման գծում լարվածությունն աճում է։ Ընդ որում, ռուս-ուկրաինական սահմանին իրավիճակը կայուն է։
«Ռուս-ուկրաինական սահմանին իրավիճակն իսկապես կայուն է։ Մենք, ի դեպ, ձեզ հետ բազմիցս լսել ենք ուկրաինացի զինվորականների հայտարարություններն այն մասին, որ նրանք այնտեղ Ռուսաստանի կողմից զորքի արտակարգ կուտակում չեն տեսնում (ռուսական տարածքից)։ Դա հերքում է այլ երկրների հայտարարությունները, որոնք անընդհատ, հղում են անում իրենց հետախուզական տվյալներին, որոնք ուկրաինացիները չեն հաստատում», - նշել է Պեսկովը։
Հիշեցնենք, որ Մոսկվան բազմիցս հայտարարել է, որ Կիևը չի կատարում Մինսկի համաձայնությունները և ձգձգում է հակամարտության կարգավորման շուրջ բանակցությունները ։ ՌԴ ԱԳՆ-ում նշել են, որ Կիևը Դոնբաս է ուղարկել Ուկրաինայի ԶՈւ անձնակազմի կեսը։ Մոսկվան անհանգստություն է հայտնել ռուսական սահմաններին ՆԱՏՕ-ի երկրների ռազմական տեխնիկայի տեղափոխման և Դոնբասում արևմտյան հրահանգիչների թվի ավելացման կապակցությամբ: Արևմուտքի երկրները շարունակում են Ուկրաինային ռազմական աջակցություն ցուցաբերել, այդ թվում ՝ սպառազինություն մատակարարելով, որը կիրառվում է Դոնբասում։