ԵՐԵՎԱՆ, 16 փետրվարի – Sputnik. Այսօր ադրբեջանական զինված ուժերի զինծառայողները զենքի սպառնալիքով թույլ չեն տվել, որ գյուղացիներն աշխատեն Ասկերանի շրջանի Խրամորթ գյուղի վարչական տարածքի խաղողի այգիներում։
Sputnik Արմենիայի հետ զրույցում Արցախի ՆԳՆ մամուլի խոսնակ Հունան Թադևոսյանը նշեց` Ասկերանի ոստիկանության շրջանային բաժնից հայտնել են, որ նման միջադեպերը հաճախակի են լինում։
«Երբ գյուղացիները փորձում են խաղողի այգիներում կամ առհասարակ այդ տարածքում աշխատել, ադրբեջանական կողմը թույլ չի տալիս։ Այս պահին Ասկերանի ոստիկանության շրջանային բաժնի պետն ու ռուս խաղաղապահները համատեղ բանակցություններ են վարում, որպեսզի գյուղացիները կարողանան եղանակների տաքանալուն պես իրենց աշխատանքը վերսկսել»,– նշեց Թադևոսյանը։
Նա ընդգծեց, որ հրաձգություն, կրակոցներ չեն եղել։
Հիշեցնենք՝ փետրվարի 15-ին, ժամը 15։30-ի սահմաններում նույն Խրամորթ համայնքի հարևանությամբ ամրակայված ադրբեջանական դիրքից հրազենով կրակ են բացել այդ վարչական տարածքում տեղակայված վարելահողում տրակտորով գյուղատնտեսական նշանակության աշխատանքներ կատարող անձանց ուղղությամբ: Հ
Հակառակորդի կրակոցների հետևանքով խոցվել է տրակտորը, իսկ քաղաքացիներին հաջողվել է փրկվել ռուս խաղաղապահների միջամտության շնորհիվ: