Ուկրաինական ճգնաժամը Եվրոպային և Կիևին ոչինչ չտվեց, ԵՄ-ն հասկացավ, որ ռուս–ամերիկյան աշխարհաքաղաքական բախման դեպքում ինքը դառնալու է թատերաբեմ, առաջին տուժողներրից մեկը, Sputnik Արմենիայի հետ զրույցում նման կարծիք հայտնեց միջազգայնագետ Գրիգոր Բալասանյանը։
«Թեև ՌԴ–ն սկսեց իր զորքերի մասնակի դուրսբերումը Բելառուսից և հայտարարեց, որ զորավարժություններն ավարտվել են, բայցևայնպես ռուսական կողմը շարունակելու է ներկայացվածություն ունենալ Բելառուսում և Ուկրաինայի հետ սահմանամերձ շրջաններում, հետևաբար չի բացառվում, որ Արևմուտքն ու Ռուսաստանը որոշակի պայմանավորվածություններ են ձեռք բերել կամ որևէ կետի շուրջ եկել են ընդհանուր հայտարարի։
Որպես նախապայման էլ ՌԴ–ն իրականացրել է Ուկրաինայի շուրջ տեղակայված իր զորքերի թվաքանակի կրճատումը»,– ասաց միջազգայնագետը։
Բալասանյանի գնահատմամբ` գործողությունները տեղավորվում են դեռևս ժամանակին ԱՄՆ–ի կողմից Ռուսաստանին փակ ծրարով ուղարկված պատասխանում նշված քայլերի տրամաբանության մեջ, և այստեղ Արևմուտքը խնդիր ունի փրկելու դեմքն ու պատվով դուրս գալու իրավիճակից։
Այդուհանդերձ պետք է արձանագրել, որ երկուստեք զորքերի հետքաշումը Ուկրաինային ոչինչ չտվեց, և այդ պետությունը մնաց մենակ այն խնդիրների առջև, որոնք կային նախօրոք։
«ՌԴ Պետդուման հավանություն է տվել Դոնբասի ու Լուգանսկի հանրապետությունների ճանաչման նախագծին, այսիքն` մի կողմից տեսնում ենք զորքերի հետքաշում, բայց մյուս կողմից ՌԴ–ն ավելացնում է ճնշումն Արևմուտքի և Ուկրաինայի նկատմամբ։ Իրադարձություններից դեռ չի կարելի եզրակացնել, որ ականատես ենք լինում ձնհալի, որ հարաբերությունները կարող են կարգավորվել առանց պատերազմական գործողությունների, թեև կողմերն ընդառաջ քայլեր, այնուամենայնիվ, կատարում են»,– ասաց միջազգայնագետը։
Բալասանյանի կարծիքով` ուկրաինական ճգնաժամի առաջին փուլը Ռուսաստանին տվեց այն, որ ՌԴ–ն ամբողջ աշխարհին ցույց տվեց, որ մինչև վերջ կանգնած է իր կենսական շահերի պաշտպանության առաջնագծում, որտեղից ոչ մի քայլ չի նահանջելու։ Ըստ նրա` ՌԴ–ն կարողացավ ճեղքում մտցնել ՆԱՏՕ–ի անդամ երկրների շարքում, որոնք Ուկրաինա զինուժ ուղարկելու հարցում չունեին միանման դիրքորոշում։ ԱՄՆ–ն իր հերթին ճգնաժամի առաջին փուլում մեծ ծավալի սպառազինություն տրամադրեց Ուկրաինային, բայց զինամթերքն անվճար չէ, և Ուկրաինան, ի վերջո, շատ թանկ է վճարելու դրա համար։
Նշենք, որ ՌԴ ԱԳ նախարար Սերգեյ Լավրովը հայտարարել է, թե ՆԱՏՕ-ն փոխել է իր դիրքորոշումը ՌԴ-ի հետ Եվրոպայում սպառազինությունների սահմանափակումը քննարկելու ցանկության հարցում, և դա վկայում է այն մասին, որ ամեն ինչ կորած չէ։
Հավելենք, որ ՌԴ Հարավային և Արևմտյան ռազմական օկրուգները զորավարժություններից հետո սկսել են վերադարձնել զորքերը տեղակայման վայրեր։
Ռուսաստանը բազմիցս հերքել է Արևմուտքի և Ուկրաինայի` «ագրեսիվ գործողությունների» վերաբերյալ մեղադրանքները՝ հայտարարելով, որ ոչ մեկին չի սպառնում և ոչ մեկի վրա չի պատրաստվում հարձակվել, իսկ «ՌԴ ագրեսիայի» մասին հայտարարությունները պատրվակ են ռուսական սահմանների մոտ ՆԱՏՕ-ի ավելի շատ ռազմական տեխնիկա տեղակայելու համար։