Շիրակում երկրաշարժի հետևանքով փլուզումներ չկան. մարզպետ

ԵՐԵՎԱՆ, 13 փետրվարի – Sputnik. Շիրակի մարզում еրկրաշարժը մեծ ուժգնությամբ զգացվել է Գյումրիում՝ բնակելի շենքերում, ինչպես նաեւ Աշոցքի տարածաշրջանում: Facebook-ի իր էջում գրել է Շիրակի մարզպետ Նազելի Բաղդասարյանը։

Աշոցք համայնքի ղեկավար Կարեն Մանուկյանի փոխանցմամբ` այս պահի դրությամբ արձանագրված փլուզումներ չկան։

ԱԻՆ–ից էլ ավելի ուշ հայտնեցին, որ ըստ նախնական տվյալների երկրաշարժի հետևանքով հանրապետության տարածքում ավերածություններ չկան:

Ինչպես արդեն հայտնել ենք, փետրվարի 13-ին ժամը 22:25-ին ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 41.19⁰ և արևելյան երկայնության 43.97⁰ աշխարհագրական կոորդինատներով Վրաստան-Հայաստան` Բավրա քաղաքից 16 կմ հյուսիս-արևելք, օջախի 10 կմ խորությամբ, 5.2 մագնիտուդով երկրաշարժ:

Էպիկենտրոնային գոտում ստորգետնյա ցնցման ուժգնությունը կազմել է 6-7 բալ:

Երկրաշարժը զգացվել է Շիրակի, Լոռու, Արագածոտնի մարզերում 4-5 բալ ուժգնությամբ և Երևան քաղաքում 3 բալ ուժգնությամբ: