ԵՐԵՎԱՆ, 13 փետրվարի – Sputnik. Գերմանիայի նախագահ Ֆրանկ–Վալտեր Շտայնմայերը, որն այսօր վերընտրվեց երկրորդ ժամկետի համար, հայտարարել է, որ Եվրոպայում «պատերազմի վտանգ» կա, և հորդորել միասին ուղիներ փնտրել աշխարհամասում խաղաղություն հաստատելու համար։ Այս մասին ԳԴՀ–ի առաջնորդն ասել է նախագահի պաշտոնում վերընտրվելուց անմիջապես հետո Դաշնային ժողովի առաջ ելույթ ունենալիս։
«Պատերազմի բացակայությունը մեր աշխարհամասում սովորական բան է դարձել։ Բարեկամների պաշտպանություն, խաղաղություն հարևանների հետ, 30 տարի վերամիավորումից անց. ինչ հաջողություն է մեր երկրի համար։ Սակայն այս օրերին մենք հասկացանք, որ խաղաղությունն ինքնին ենթադրյալ բան չէ, դրա համար պետք է աշխատել, երկխոսության մեջ լինել, անհրաժեշտության դեպքում` պարզ, զսպող, վճռական տեսքով, այդ ամենը հարկավոր է այսօր։ Պարզության առումով պետք է նշել, որ կարելի է երկար բանավիճել Ռուսաստանի և Արևմուտքի միջև աճող անմիաբանություն պատճառների մասին։ Սակայն անվիճելի է, որ մենք Արևելյան Եվրոպայում պատերազմի, ռազմական հակամարտության սպառնալիքի իրավիճակում ենք գտնվում», – հայտարարել է Շտայնմայերը։
Նա նաև անդրադարձավ ԵԱՀԿ–ի սկզբունքներին` կոչ անելով «թարմացնել այդ անգին ժառանգությունը»։ Բացի այդ, նա դիմեց ՌԴ նախագահ Վլադիմիր Պուտինին։
«Մեզ հետ միասին ուղիներ փնտրեք, որոնք Եվրոպայում խաղաղություն կերաշխավորեն», – ասել է Շտայնմայերը։
Արևմուտքը մեղադրում է ՌԴ–ին Ուկրաինայի շուրջ իրավիճակը սրելու համար։ Մոսկվայում դա կտրականապես հերքում են և մշտապես հայտարարում, որ որևէ մեկին որևէ բանով չեն սպառնում, իսկ բոլոր նման հայտարարությունները առիթ են ավելի շատ ՆԱՏՕ–ի ռազմական տեխնիկա ՌԴ սահմանների մոտ տեղակայելու համար։
Ինչպես ավելի վաղ հայտարարել էր ՌԴ արտգործնախարար Սերգեյ Լավրովը, Ռուսաստանը որևէ առիթ չի ստեղծում Ուկրաինայի շուրջ կոնֆլիկտային իրավիճակ հրահրելու համար։ Նրա խոսքով` Ռուսաստանը չի բացառում, որ Ուկրաինայի վերաբերյալ Արևմուտքի հիստերիան միտված է Դոնբասի վերաբերյալ Մինսկի համաձայնագրերի սաբոտաժի ենթարկելու Կիևի դիրքորոշումը քողարկելու համար։ ՌԴ նախագահի մամուլի քարտուղար Դմիտրի Պեսկովի խոսքով` ԱՄՆ–ի և ՆԱՏՕ–ի տեղեկատվական հիստերիան Ուկրաինայի վերաբերյալ շռայլորեն պատված է ստով և ֆեյքերով։