ԵՐԵՎԱՆ, 11 փետրվարի – Sputnik. ՀՀ առողջապահության նախարար Անահիտ Ավանեսյանը հերքում է լուրերը, թե արդեն իսկ կանխորոշված է` ով է փոխարինելու աշխատանքից ազատման դիմում գրած փոխնախարար Գևորգ Սիմոնյանին։
Հայտնել էինք, որ փոխնախարար Գևորգ Սիմոնյանի՝ Երևանի փոխքաղաքապետ նշանակվելուց հետո առողջապահության փոխնախարարի պաշտոնը թափուր է։ «Հրապարակ» թերթի տեղեկություններով` Անահիտ Ավանեսյանը պատրաստվում է այդ պաշտոնին նշանակել իր ընկերուհուն՝ առողջապահության նախարարության գլխավոր քարտուղար Վարդուհի Գրիգորյանին։
«Վարդուհի Գրիգորյանն առողջապահության նախարարությունում աշխատում է երկար տարիներ, և նա երկար ճանապարհ է անցել` առաջատար մասնագետ է եղել, իսկ հիմա նախարարության գլխավոր քարտուղարն է։ Ես ունեմ շատ լավ գործընկերային հարաբերություններ իմ բոլոր տեղակալների և մեր աշխատակիցների հետ»,– Sputnik Արմենիայի հետ զրույցում ասաց Ավանեսյանը։
Նրա խոսքով` մինչ այս պահն առողջապահության փոխնախարարի պաշտոնը թափուր է, և նախարարը պատրաստվում է առաջիկայում հանդիպումներ և քննարկումներ ունենալ, որից հետո էլ կորոշի` ով կստանձնի այդ պաշտոնը։