ԵՐԵՎԱՆ, 11 փետրվարի – Sputnik. Հայ ֆիզիկոս, Վանկուվերի Սայմոն Ֆրեյզեր համալսարանի (SFU) պրոֆեսոր և Բյուրականի աստղադիտարանի արտասահմանյան աշխատակից Լևոն Պողոսյանն արժանացել է Բուխալտերի տիեզերաբանության 2021թ․ մրցանակին։ Տեղեկությունը հայտնում է Բյուրականի աստղադիտարանը։
Լևոն Պողոսյանը և նրա աշխատակիցը առաջին տեղի մրցանակին են արժանացել նախասկզբյան մագնիսական դաշտերի միջոցով Հաբլյան լարվածությունը բացահայտելու վերաբերյալ իրենց նոր հետազոտության համար։
Հաբլյան լարվածությունը տիեզերաբանության ամենամեծ հանելուկներից է, որը վերաբերում է Հաբլի հաստատունի ակնհայտ տարբերությանը կամ նրան, թե որքան արագ է տիեզերքն ընդլայնվում այսօր։ Սա որոշվում է տարբեր տեսակի դիտումների միջոցով։
Իրենց աշխատանքում Պողոսյանն ու նրա աշխատակիցը ցույց են տվել, թե ինչպես վաղ տիեզերքի մագնիսական դաշտերը հաշվի առնելը կարող է օգնել լուծելու այդ տարբերությունը:
Բուխալտերի տիեզերաբանության մրցանակը հիմնադրվել է 2014թ.-ին: Այն տրվում է տիեզերաբանության մեջ բեկումնային տեսական, դիտողական կամ փորձարարական աշխատանքի համար, որը կարող է նպաստել Տիեզերքի ծագման, կառուցվածքի և էվոլյուցիայի մասին մեր ունեցած պատկերացումների ընդլայնմանը: