ԵՐԵՎԱՆ, 10 փետրվարի – Sputnik. Թուրքիան ցանկանում է Հայաստանի հետ հարաբերությունների կարգավորման հանդիպումներ անցկացնել Անկարայում և Երևանում։ Այս մասին հայտարարել է Թուրքիայի ԱԳՆ ղեկավար Մևլութ Չավուշօղլուն։
«Առաջին հանդիպումը, ինչպես հայտնի է, եղել է Մոսկվայում, երկրորդը նախատեսվում է կազմակերպել փետրվարի 24-ին Վիեննայում։ Մենք ցանկանում ենք հանդիպումներ ունենալ Անկարայում և Երևանում, սակայն հայկական կողմն ընտրել է երրորդ երկիրը։ Ոչինչ, գլխավորն այն է, որ գործընթացն ընթանում է»,-հայտարարել Է Չավուշօղլուն TRT Haber հեռուստաալիքին տված հարցազրույցում։
Չավուշօղլուն նշել է, որ Հայաստանը պետք է օգտվի շանսից և վերանայի իր դիրքորոշումները։ Նա կրկին շեշտել է, որ Թուրքիան Հայաստանի վերաբերյալ բոլոր քայլերը քննարկում է Բաքվի հետ, իսկ Ադրբեջանը հանդես է գալիս Հայաստանի հետ երկարաժամկետ խաղաղության օգտին։
«Մենք միամիտ չենք։ Դրանով հանդերձ, սակայն, գիտակցում ենք վճռական քայլերի անհրաժեշտությունը», - ասել է Չավուշօղլուն։
Հիշեցնենք` Հայաստանի և Թուրքիայի միջև դիվանագիտական հարաբերություններ չկան. 2009 թվականին Ցյուրիխում երկու երկրների արտգործնախարարները դիվանագիտական հարաբերություններ հաստատելու մասին արձանագրություններ ստորագրեցին, սակայն այդ փաստաթղթերն այդպես էլ չվավերացվեցին։
Երևանն ու Անկարան 2021 թվականի դեկտեմբերին հայտարարեցին, որ պատրաստ են հարաբերությունների կարգավորմանն ուղղված հստակ քայլեր ձեռնարկել և երկուստեք հատուկ ներկայացուցիչներ նշանակեցին, Անկարան՝ Վաշինգտոնում Թուրքիայի նախկին դեսպան Սերդար Քըլըչին, իսկ Հայաստանը՝ Ազգային ժողովի նախագահի տեղակալ Ռուբեն Ռուբինյանին։
Հունվարի 14-ին Հայաստանի և Թուրքիայի հատուկ ներկայացուցիչները հանդիպեցին Մոսկվայում։
Ավելի ուշ ԱԳՆ–ն հայտարարեց, որ կողմերը համաձայնել են շարունակել լիարժեք կարգավորմանն ուղղված բանակցությունները՝ առանց նախապայմանների։
Ռուբեն Ռուբինյանի և Սերդար Քըլըչի հաջորդ հանդիպումը նախատեսված է փետրվարի 24-ին Վիեննայում։