ԵՐԵՎԱՆ, 10 փետրվարի – Sputnik. Բարձրագույն դատական խորհուրդն անընդունելի է համարում, որ Մարդու իրավունքների պաշտպան Արման Թաթոյանը, Բարձրագույն դատական խորհրդի գործունեության մասին իր հայտարարությունն անելուց առաջ «հարկ չի համարել» ստանալ Խորհրդի դիրքորոշումը։ Այս մասին ԲԴԽ–ն հայտարարություն է տարածել ֆեյսբուքյան իր էջում։
Նշենք, որ երեկ ՀՀ ՄԻՊ Թաթոյանը հայտարարել էր, որ խախտվել են Սյունիքի մարզի ընդհանուր իրավասության դատարանի դատավոր Բորիս Բախշիյանի արդար դատաքննության և անձնական ազատության իրավունքների երաշխիքները։
ԲԴԽ–ից հայտնում են, որ փետրվարի 10-ին Մարդու իրավունքների պաշտպան Արման Թաթոյանի հրապարակած հայտարարության մեջ խնդրահարույց են մի շարք դատողություններ, որոնք վերաբերում են ՀՀ դատարաններում քննվող և հետագայում հնարավոր քննության առարկա հանդիսացող քրեական գործի հանգամանքներին և դրանց գնահատմանը:
«Կոնկրետ քրեական գործով միայն շահագրգիռ՝ պաշտպանական կողմի մոտեցումների վերարտադրման արդյունքում կատարված եզրակացությունները որպես սահմանադրական մարմնի դիրքորոշում ներկայացնելը անուղղակի միջամտություն է դատական իշխանության անկախությանը»,– նշված է հաղորդագրության մեջ։
Շեշտվում է, որ Թաթոյանի «նման գործելակերպը չի կարող նպաստել Մարդու իրավունքների պաշտպանի, որպես սահմանադրական մարմնի անաչառության և օբյեկտիվության ապահովմանը»։
«Կոչ ենք անում վերջինիս չձեռնարկել քայլեր, որոնք կարող են դիտվել որպես Մարդու իրավունքների պաշտպանի կողմից դատական իշխանության գործունեությանը միջամտություն»,–նշված է հաղորդագրության մեջ։
Նշենք, որ ՀՀ մարդու իրավունքների պաշտպան Արման Թաթոյանը ուսումնասիրություններից հետո հայտնել էր, որ Բորիս Բախշիյանի նկատմամբ հարուցված քրեական գործը դիտարկում է ՀՀ-ում դատական իշխանության անկախության և դատավորի ինքնուրույնության համար համակարգային վտանգների տեսանկյունից:
Նա արձանագրել էր, որ ԲԴԽ-ն Բորիս Բախշիյանին զրկել է իր իրավունքների պաշտպանությանը նախապատրաստվելու ժամանակից ու հնարավորությունից՝ ոտնահարելով արդար դատաքննության ու անձնական ազատության իրավունքների երաշխիքները:
Մասնավորապես, ԲԴԽ-ի երկու նիստերին նախապատրաստվելու համար Բորիս Բախշիյանն ունեցել է ընդամենը մի քանի ժամ, մինչդեռ, ինչպես նշում են Բախշիյանը և փաստաբանները, քրեական հետապնդման մարմինը ՀՀ քրեական դատավարության օրենսգրքով նախատեսված քրեական հետապնդման գործողություններ կատարել է հունվարի 11-ից սկսած, իսկ ԲԴԽ-ն էլ նախապես իմացել է այդ մասին:
Նման պայմաններում ստացվում է՝ պաշտպանության կողմը եղել է անհավասար վիճակում՝ զրկված լինելով իր իրավունքների պաշտպանության համար նախապատրաստվելու բավարար ժամանակից ու հնարավորություններից:
Հիշեցնենք, որ Սյունիքի մարզի ընդհանուր իրավասության դատարանի դատավոր Բորիս Բախշիյանը կալանավորվել է փետրվարի 7-ին։
Դատավորի դեմ քրեական հետապնդում իրականացնելու գործընթաց է սկսվել ՀՀ քրեական օրենսգրքի 348-րդ հոդվածի 3-րդ մասի (անձին ապօրինի կալանավորելու հատկանիշներով, որն առաջացրել է ծանր հետևանք) հատկանիշներով հարուցված քրգործի շրջանակներում։