ԵՐԵՎԱՆ, 10 փետրվարի – Sputnik, Արամ Գարեգինյան. Ծրագրավորող Ապիկ Զորյանի (ԱՄՆ) կազմած նոր սոֆթը կարող է օգնել ծերերի և հաշմանդամների խնամքի հարցում։ Զորյանը վերջերս է ավարտել Բերքլիի համալսարանը (մեքենայական ուսուցում), ծրագիրը կազմել է սովորելու տարիներին։
Դեմքի և շարժումների վերահսկման տեխնոլոգիան այսօր արդիական է անվտանգությունն ապահովելու համար (բանկերում, խանութներում, հանրային վայրերում, այդ թվում, օրինակ, Պեկինում այս օրերին ընթացող Օլիմպիադայում)։
Ապիկն այս տեխնոլոգիային ևս մեկ կարևոր կիրառություն է գտել. հետևել, թե ինչպես են տեղաշարժվում հիվանդները կամ ծերերը, շարժումներով որոշել տկարությունն ու հավանական անկումը։ Ծրագիրն իրական ժամանակում տեսանյութը մի քանի կադրի է բաժանում, որոնց վրա ճանաչում է անկումը կամ դրան նախորդող վիճակը. ծնկները ծալվում են, մարմինն առաջ է թեքվում և այլն։
Իր սոֆթը Ապիկը «մարզել է»՝ այնտեղ զետեղելով մարդկանց սովորական և «անհանգիստ» վիճակների միլիոնավոր պատկերներ։ Նմանատիպ դիրքերն այլ տեսանյութերի վրա արձանագրելով` համակարգը բացահայտում է անհանգիստ իրավիճակը։
Երբ նման կադրերի քանակը կրիտիկական մակարդակի է հասնում, համակարգը տագնապի ազդանշան է տալիս։ Որքան ավելի շուտ տարեց մարդուն կամ հաշմանդամին օգնության հասնեն, այնքան լավ (այստեղ նույնիսկ վայրկյաններն են կարևոր)։ Այդ պատճառով Ապիկը ծրագիրն առավելագույնս թեթև է ստեղծել։
Գրաֆիկական պրոցեսորով (GPU) միկրոհսկիչը
© Photo : provided by Apik Zoryan
Այդ նպատակով նա կիրառել է TSM (temporal shift module) ծրագրային մոդուլը, որը վերլուծում է յուրաքանչյուր կադրը. երկչափ պատկերը կադրի վրա հնարավոր է ավելի արագ կարդալ, քան եռաչափը` տեսանյութի։
Իր սոֆթը Ապիկը տեղադրել է գրաֆիկական պրոցեսորով (GPU) միկրոհսկիչի վրա, որն անհրաժեշտ է միացված տեսախցիկից ստացվող պատկերը վերլուծելու համար։ Նոր համակարգն արդեն իսկ փորձարկվել է ԱՄՆ-ում շտապօգնության մի քանի բաժանմունքներում, նախապատրաստվում է դրա փորձարկումը նաև ծերանոցներում։