ԵՐԵՎԱՆ, 9 փետրվարի – Sputnik. Դպրոցների կուսակցականացումը կանխելու համար ՀՀ կառավարությունն առաջարկում է տնօրենի պաշտոնում առաջադրվելու իրավունք սահմանել միայն շարքային կուսակցականների համար։
Այս մասին այսօր ՀՀ ԱԺ հերթական նիստում «Հանրակրթության մասին» օրենքում փոփոխությունների փաթեթում առաջին ընթերցումից հետո կատարված նոր լրացումները ներկայացնելիս ասաց ԿԳՄՍ փոխնախարար Ժաննա Անդրեասյանը։
«Արձագանքելով դպրոցների կուսակցականացման և քաղաքական գործընթացների մեջ ներքաշման մտահոգություններին` օրենքի նախագծում առաջարկում ենք նաև սահմանել, որ տնօրեն կամ համակարգող չի կարող առաջադրվել և լինել այն անձը, որը հանդիսանում է կուսակցության ու նրա տարածքային ստորաբաժանման մարմինների ղեկավար ու դրա վերահսկողություն իրականացնող մարմինների անդամ»,– ասաց Անդրեասյանը։
Բացի այդ, դպրոցի ղեկավար չեն կարող լինել նաև քրեական հետապնդման ենթարկված ու չարդարացված աձինք։
«Հանրակրթության մասին» օրենքի փոփոխությունների փաթեթն առաջին ընթերցմամբ ընդունվել էր 2021–ին։
2021 թվականի նոյեմբերի 25-ին կառավարությունը հավանություն տվեց նախագծին, որով առաջարկվում է տարանջատել դպրոցների վարչատնտեսական ու կրթական կառավարումները։ Դպրոցների շատ տնօրեններ, ինչպես նաև կրթության փորձագետները միակարծիք չեն այս փոփոխության առնչությամբ, քանի որ մտածում են, որ երկիշխանություն կստեղծվի։