Ինչպիսի՞ն կլինի Երևանի նոր աղբավայրը, և ի՞նչ են անելու հնի հետ․ քաղաքապետարանի պատասխանը

ԵՐԵՎԱՆ, 9 փետրվարի – Sputnik. Ժամանակակից չափանիշներին համապատասխան նոր աղբավայրի կառուցման մասին համաձայնագիրը, նախնական տեղեկություններով, կստորագրվի 2022 թվականի երկրորդ կեսին: Այս մասին Sputnik Արմենիայի գրավոր հարցմանն ի պատասխան հայտնել են Երևանի քաղաքապետարանից։

Համաձայնագիրը պետք է ստորագրվեր 2021 թվականի աշնանը, հետաձգվեց մինչև 2022 թվականի փետրվար։ Մայրաքաղաքում կա երկու աղբավայր․ մեկը գտնվում է Աջափնյակ թաղամասում և չի գործում։ Գործում է միայն Նուբարաշենի աղբավայրը։ Հայտնի չէ, թե ինչ վնաս է այն հասցնում տարիներ շարունակ։

Զուգահեռաբար ընթանում է Նուբարաշենի նոր աղբավայրի նախագծման, կառուցման, Նուբարաշենի և Աջափնյակի (չգործող) աղբավայրերի փակման շինարարական աշխատանքների ձեռքբերման մրցույթի գործընթացը։ Մրցույթի առաջին փուլն ավարտվել է, հայտարարված է երկրորդը, որը կկայանա 2022 թվականի երկրորդ կեսին։

Նոր աղբավայրը կտրուկ տարբերվելու է ներկայում գործողից։ Դրա տարածքում նախատեսվում է կառուցել գրասենյակային, լաբորատոր շինություններ, շահագործման ճանապարհներ, մեքենաների անվադողերի մաքրման կայան, վառելիքի լցակայան։ Ամբողջ տարածքը կցանկապատվի։

«Աղբավայրի շահագործման համար անհրաժեշտ կլինի նաև ձեռք բերել մեքենա-մեխանիզմներ (տոփանիչ, բուլդոզեր, ինքնաթափ և այլն): Նոր աղբավայրի հատակն ամբողջապես ծածկվելու է անջրաթափանց շերտով, որը թույլ չի տա կեղտաջրերի ներթափանցում մայր գրունտ»,-նշվում է քաղաքապետարանի պատասխանում։

Բացի այդ, առաջացած կեղտաջրերը կմաքրվեն հատուկ մաքրման կայանում: Աղբվայրում տեղադրված աղբն օրական կտրվածքով կծածկվի գրունտով՝ բնապահպանական ռիսկերի նվազեցման և դրանց կառավարման նպատակով։

Նախատեսվում է կառուցել նաև գազի կուտակման համար անհրաժեշտ հորեր, խողովակներ, ավելցուկ գազի այրման սարքավորում, ինչպես նաև տեղադրել էլեկտրաէներգիայի ստացման համար անհրաժեշտ գեներատոր` 1.4 ՄՎտ հզորությամբ։

Քաղաքային իշխանությունները նախատեսում են լիովին փակել Նուբարաշենի գործող աղբավայրը, իսկ աղբը օգտահանել։ Դրա համար մոտ երկու տարի կպահանջվի։

Նախագծի արժեքը 26 մլն եվրո է, որից 8 միլիոնը վարկ են վերցնելու Վերակառուցման և զարգացման եվրոպական բանկից, ևս 8 միլիոնը՝ Եվրոպական ներդրումային բանկից։ Դրանից բացի 8 միլիոնի դրամաշնորհ կտրամադրի ԵՄ-ն, 2 միլիոնի դրամաշնորհ՝ Էներգաարդյունավետության և շրջակա միջավայրի Արևելյան Եվրոպայի գործընկերությունը:

Նոր աղբավայրը նախատեսված կլինի կենցաղային և շինարարական թափոնների համար։