Ուղևորափոխադրողների միության նախագահ Հրանտ Եղիազարյանը համարում է, որ ավտոկայանները կոնցեսիոն կառավարման հանձնելու` կառավարության մտադրությունը տեղին է։ Եղիազարյանը Sputnik Արմենիայի հետ զրույցում կարծիք է հայտնել, որ մասնավոր հատվածն ավելի արդյունավետ կիրականացնի ավտոկայանների կառավարումը։
«Ավտոկայաններն այսօր գտնվում են կիսաանտեր վիճակում, իսկ շահույթ հետապնդելու փաստը մասնավորին կշահագրգռի ավելի ճիշտ կառավարել այդ ոլորտը, այնպես որ անհանգստանալու կարիք չկա»,-նշում է Ուղևորափոխադրողների միության նախագահը։
Միևնույն ժամանակ, Հրանտ Եղիազարյանը ենթադրում է, որ ավտոկայանները մասնավորին հանձնելու դեպքում ուղեվարձը կթանկանա։
«Ուղեվարձի թանկացումն անխուսափելի է, քանի որ երկար տարիներ միջմարզային ուղևորափոխադրումների արժեքը շատ չի փոփոխվել»,-նկատում է Ուղևորափոխադրողների միության նախագահը։
Հիշեցնենք` կառավարությունը մտադիր է «Ավտոկայան» ՓԲԸ-ն հանձնել կոնցեսիոն կառավարման։ Բացի Կենտրոնական ու Հյուսիսային երկու մեծ ավտոկայաններից՝ Երևանում կա երթակարգավորման ևս 6 կետ։
Իշխանությունները նախատեսում են փակել դրանք ու կարգավորման գործընթացը կենտրոնացնել ավտոկայաններում։
Ազգային ժողովի նիստում ՀՀ տարածքային կառավարման ու ենթակառուցվածքների փոխնախարար Արմեն Սիմոնյանը հայտնել է, որ այժմ քննարկվում է «Ավտոկայան» ՓԲԸ-ի անցումը կոնցեսիոն կառավարման, որը ենթադրում է կապիտալ ներդրումներ առաջին 2 տարում` 15-20 մլն դոլարի չափով։ Նշենք, որ «Ավտոկայան» ՓԲԸ–ն 100 տոկոս պետական բաժնեմասով ընկերություն է։