ԵՐԵՎԱՆ, 7 փետրվարի – Sputnik. Հայաստանում գործող ավելի քան 10 հասարակական կազմակերպություններ բաց նամակով դիմել են ՀՀ վարչապետին ու կառավարությանը` պահանջելով կանխել Ադրբեջանի նախաձեռնած հերթական մշակութային եղեռնը։
«Պահանջում ենք ՀՀ վարչապետից և կառավարությունից (մասնավորապես՝ ՀՀ արտաքին գործերի նախարարությունից ու կրթության, գիտության, մշակույթի և սպորտի նախարարությունից) անհապաղ դիմել ՄԱԿ-ի համապատասխան կառույցներին, այդ թվում՝ ՅՈւՆԵՍԿՕ-ին (այդ թվում՝ գործելով որպես ՅՈւՆԵՍԿՕ-ի գլխավոր խորհրդի անդամ) և մշակութային հարցերով հատուկ զեկուցողին՝ կազմակերպելու այցելություն Արցախ և դիտարկելու ու փաստագրելու հայկական հուշարձանների առկա վիճակը»,– ասված է նամակում:
Հեղինակները ՀՀ իշխանություններից նաև պահանջում են Ադրբեջանի կողմից հայկական մշակութային ժառանգության վերացմանը միտված գործողությունների մասին ծանուցել ՄԱԿ-ի միջազգային արդարադատության դատարանին «Հայաստանն ընդդեմ Ադրբեջանի» գործով կիրառված միջանկյալ միջոցի չկատարման փաստով ու լրացուցիչ միջոցների կիրառում պահանջել։
Այս քայլերով նամակի տակ ստորագրած ՀԿ–ները հույս ունեն կանխել Ադրբեջանի ծրագրած հերթական հանցագործություններն ու հայկական մշակութային ժառանգության անդառնալի կորուստը:
Հասարակական կազմակերպությունների նամակին նաև քաղաքացիներ են միացել։
Հիշեցնենք, որ փետրվարի 3-ին Ադրբեջանի մշակույթի նախարար Անար Քերիմովը հայտարարել էր, թե «Ալբանիայի (Աղվանք) պատմության ու ճարտարապետության մասնագետների աշխատանքային խումբ» է ստեղծվել իբր ալբանական կրոնական տաճարներից «հայերի գրած կեղծ հետքերը» հեռացնելու համար։
Ի դեպ, արցախյան 44-օրյա պատերազմից հետո, չնայած ԵԱՀԿ Մինսկի խմբի և միջազգային տարբեր կառույցների հորդորներին, պաշտոնական Բաքուն շարունակում է արգելափակել ՅՈւՆԵՍԿՕ-ի առաքելության մուտքը գրավյալ տարածքներ։
Նշենք, որ 2021թ. դեկտեմբերի 7-ին ՄԱԿ-ի միջազգային արդարադատության դատարանը «Հայաստանն ընդդեմ Ադրբեջանի» գործով միջանկյալ միջոցների կիրառման վերաբերյալ որոշում էր կայացրել, որով Ադրբեջանից պահանջել էր ձեռնարկել բոլոր անհրաժեշտ միջոցառումները՝ կանխելու և պատժելու վանդալիզմի և պղծման բոլոր գործողությունները, որոնք կատարվել են հայկական մշակութային ժառանգության հանդեպ, այդ թվում՝ եկեղեցիների և պաշտամունքի այլ վայրերի, հուշարձանների, բնության վայրերի, գերեզմանների և այլ արտեֆակտների: