ԵՐԵՎԱՆ, 6 փետրվարի – Sputnik. Հայաստանի ազգային հավաքականի և լեհական «Պոգոնի» ֆուտբոլիստ Վահան Բիչախչյանը երեկվա խաղից ու գոլից հետո ասել է, որ նման նորամուտի մասին երազել անգամ չէր կարող։ Բիչախչյանը «Պոգոնի» պաշտոնական կայքի հետ զրույցում է խոսել իր նորամուտի մասին։
Հայտնել էինք, որ Վահան Բիչախչյանը Լեհաստանի առաջնությունում իր նորամուտը նշել է գոլով. մեր ընտրանու կիսապաշտպանը «Պոգոնի» կազմում 76-րդ րոպեին փոխարինման դուրս գալուց րոպեներ անց` 82-րդ րոպեին գրավել է «Պյաստի» դարպասը։
«Յուրաքանչյուր խաղում կփորձեմ առավելագույնս օգնել թիմին, քանի որ մենք պայքարում ենք ամենաբարձր նպատակների համար։ Շատ ուրախ եմ, նման նորամուտի մասին անգամ երազել չէի կարող։ Գոլ խփելն ու գոլային փոխանցումներ կատարելն իմ աշխատանքն է։ Միշտ ցանկանում եմ օգնել թիմին»,- ասել է Բիչախչյանը։
Նա նշել է, որ հույս ունի տնային մարզադաշտում էլ շուտով վայելել գոլ խփելու բերկրանքը։ Բիչախչյանը պատմել է, որ դեռ նախավարժանքի դուրս գալիս է զգացել երկրպագուների աջակցությունը։
Բացի այդ, լեհական Էկստրակլասայի թվիթերյան պաշտոնական էջը գրառում է կատարել Հայաստանի ազգային հավաքականի և «Պոգոնի» ֆուտբոլիստ Վահան Բիչախչյանի մասին։ «Հիշեք այս անունը՝ Վահան Բիչախչյան»,–նշված է գրառման մեջ։
Հիշեցնենք, որ հունվարի 10-ին հայտնի դարձավ` Հայաստանի ֆուտբոլի ազգային թիմի կիսապաշտպան Վահան Բիչախչյանը կարիերան կշարունակի Լեհաստանում: Բիչախչյանը 3,5 տարվա պայմանագիր է ստորագրել լեհական Շեցին քաղաքի «Պոգոն» թիմի հետ:
Նա 2017 թվականից հանդես էր գալիս Սլովակիայի «Ժիլինայի» կազմում: Հայաստանի ֆուտբոլի ազգային թիմի կազմում նորամուտը նշել է 2020 թվականին: