ԵՐԵՎԱՆ, 6 փետրվարի – Sputnik. Պեկինում ընթացող ձմեռային օլիմպիական խաղերում Հայաստանը ներկայացնող Կատյա Գալստյանն ու Անգելինա Մուրադյանը Sputnik Արմենիայի հետ զրույցում վստահեցնում են, որ կանեն հնարավորինը լավ արդյունք ցույց տալու համար։
Փորձառու Կատյա Գալստյանի համար սրանք օլիմպիական երրորդ խաղերն են, իսկ Անգելինա Մուրադյանը առաջին անգամ է մասնակցում նման կարգի մրցումների։
Sputnik Արմենիայի հետ հարցազրույցում Կատյա Գալստյանը խոսեց իրենց նախապատրաստվելու մասին, շատ կարևորեց Անգելինա Մուրադյանի ներկայությունը, որի շնորհիվ ինքը միայնակ չի ներկայացնում մեր երկիրը մրցումներին։
Իր հերթին օլիմպիական խաղերի նորեկ Անգլիան Մուրադյանը ասաց, որ շատ հանգիստ է պատրաստվում մրցումներին։
Կատյա Գալստյանը իր առաջին մեկնարկը վերցնելու է փետրվարի 8-ին սպրիտում (արագավազք)։ Իսկ փետրվարի 10-ին մեր երկու դահուկորդուհիներն էլ կմասնակցեն 10կմ դասական ոճով մրցումներին։
Հիշեցնենք, որ Հայաստանի հավաքականի կազմում առաջինը մեկնարկի դուրս եկավ Միքայել Միքայելյանը։ Սկիաթլոնում (15կմ դասական ոճով + 15կմ ազատ ոճով) մեր ներկայացուցիչը 70 դահուկորդների մասնակցությամբ մրցատարածությունում զբաղեցրեց 47-րդ տեղը։ Միքայելյանը երկրորդ ու վերջին մեկնարկը օլիմպիական խաղերում կայանալու է փետրվարի 11-ին։ Այդ օրը հայ դահուկորդը կմրցի 15 կմ դասական ոճով մրցատարածությունում։
Պեկինի 24-րդ ձմեռային օլիմպիական խաղերում Հայաստանից մասնակցելու էին վեց մարզիկներ։ Բայց լեռնադահուկորդ Հարություն Հարությունյանը մեր պատվիրակության հետ չմեկնեց Չինաստանի մայրաքաղաք կորոնավիրուսի դրական թեստի պատճառով։ Սակայն չի բացառվում, որ հայ լեռնադահուկորդը մասնակցի օլիմպիական խաղերին։ Հարությունյանը պետք է մասնակցի փետրվարի 13-ին հսկա սլալոմի, իսկ փետրվարի 16-ին՝ սլալոմի մրցումներին։ Եթե մեր մարզիկը բացասական թեստ ունենա, կարող է դեռ հասցնել մեկնել Պեկին։