ԵՐԵՎԱՆ, 4 փետրվարի – Sputnik. ՀՀ վարչապետ Նիկոլ Փաշինյանն այսօր հյուրընկալել է կոմպոզիտոր, դիրիժոր Լորիս Ճգնավորյանին: Տեղեկությունը հայտնում են ՀՀ վարչապետի մամուլի ծառայությունից։
«Փաշինյանը հետաքրքրվել է կոմպոզիտորի ընթացիկ գործունեությամբ և հույս հայտնել, որ նա կշարունակի նոր հեղինակային գործերով հարստացնել հայ երաժշտարվեստը»,-նշված է հաղորդագրության մեջ:
Վարչապետն անգնահատելի է համարել Ճգնավորյանի ավանդը երաժշտական արվեստում:
Հանդիպման ընթացքում քննարկվել են մաեստրոյի նոր ստեղծագործությունները հայրենիքում ներկայացնելու հնարավորություններն ու հեռանկարները:
Նշենք, որ իրանահայ հայտնի կոմպոզիտոր, դիրիժոր Լորիս Ճգնավորյանը 2019 թվականին դարձավ ՄԱԿ-ի խաղաղության դեսպան՝ Իրանի կողմից:
Լորիս Ճգնավորյանը ծնվել է Իրանում 1937 թվականին։ 1975 թվականից ապրել և աշխատել է Վիեննայում, Լոնդոնում: 1978 թվականին Լոնդոնում հիմնել է Հայ երաժշտության ինստիտուտը։
Ճգնավորյանը 1989 թվականից գործունեություն է ծավալել Հայաստանում, 1989-1998 և 1999-2000 թվականներին Հայաստանի ֆիլհարմոնիկ նվագախմբի գեղարվեստական ղեկավար և գլխավոր դիրիժորն է եղել:
Գրել է 5 օպերա, Ռեքվիեմ և բազմաթիվ երաժշտական ստեղծագործություններ։