ԵՐԵՎԱՆ, 4 փետրվարի – Sputnik, Արամ Գարեգինյան. Dubai Expo ցուցահանդեսում Հայաստանի տաղավարը փոքր տաղավարների մեջ ամենաշատ այցելվածների առաջին տասնյակում է, իսկ այցելուների տված վարկանիշով` առհասարակ լավագույնների մեջ: Այս մասին Sputnik Արմենիայի հետ զրույցում ասաց ՀՀ էկոնոմիկայի փոխնախարար Նարեկ Տերյանը։ Dubai Expo ցուցահանդեսի մոտ 10 միլիոն այցելուներից Հայաստանի տաղավարում արդեն եղել են մոտ 300 հազարը։
«Մենք ցանկացել են ցույց տալ մեր երկրի ու ժողովրդի հեռավոր անցյալն ու ներկան` սկսած հնագույն գինու հնձանից ու կաշվե կոշիկից, վերջացրած այսօրվա տեխնոլոգիական զարգացմամբ, և նշել, որ տեխնոլոգիան միշտ եղել և զարգացել է մեր պատմության ընթացքում։ Ներկայացրել ենք գյուղատնտեսությունը և տուրիզմը, ինչպես նաև արդյունաբերության գերակա ուղղությունները` քիﬕան, մետալուրգիան, դեղագործությունը, սարքաշինությունը, թեթև արդյունաբերությունը», – պատմեց փոխնախարարը։
Նա հիշեցրեց, որ երկու օր առաջ Enterprise Armenia կազմակերպությունը (ներդրումների ներգրավման ազգային կառույց) և Աբու–Դաբիի առևտրաարդյունաբերական պալատը ստորագրել են համագործակցության հուշագիր ու քննարկել մի շարք ծրագրեր, իսկ հունվարի 31-ին էկոնոմիկայի նախարար Վահան Քերոբյանը հանդիպել է Դուբայի շեյխ Սաիդ Բին Ահմեդ Ալ–Մաքթումի գրասենյակի ղեկավարի հետ։ Այժմ արաբական խոշոր ընկերություններից մեկի հետ քննարկվում է երկու դեվելոփերական (կառուցապատման և զարգացման) նախագիծ։
Նա հստակեցրեց, որ նաև տեղում մշտապես աշխատում են Enterprise Armenia–ի մասնագետները, որոնք այցելուներին ներայացնում են Հայաստնաում ներդրումների պայմանները և նախատեսված պ պրեֆերենցիաները օտարերկրյա ներդրողների համար։
Տաղավարի կազմակերպիչներն ուշադրություն են դարձրել նաև մշակութային բովադակության վրա. ներկայացված էին Հայաստանից տեղափոխված արժեքավոր ցուցանմուշներ. հնագույն արձանիկներ, զարդեր, սեպագիր արձանագրություններ, հնագույն ձեռագրեր ու գրքեր, այդ թվում 1512 թվականի «Ուրբաթագիրքը»՝ տպագրված հայկական առաջին գիրքը, 12-րդ դարում ստեղծված ձեռագիր «Նարեկը» և այլ արժեքավոր նմուշներ։
Հունվարի 30-ին ցուցահանդեսում կազմակերպվել էր Հայաստանի ազգային օր (ամեն մի մասնակից երկիր ցուցահանդեսի ընթացքում ունեցել է կամ կունենա այդպիսի օր)։ Այդ օրվա շրջանակներում Հայաստանի ազգային ֆիլհարմոնիկ նվագախումբը` Սերգեյ Սմբատյանի գլխավորությամբ, հանդես է եկել ցուցահանդեսի գլխավոր հարթակում։ Այդպիսի հնարավորություն ստացել էին միայն հինգ երկրների նվագախմբեր։