ԵՐԵՎԱՆ, 3 փետրվարի – Sputnik. Եթե նույնիսկ մենք շատ ուժեղ լինենք, պետք է խաղաղության ձգտենք։ Հանրային հեռուստաընկերությանը տված հարցազրույցում ասել է ՀՀ նախագահի թեկնածու Վահագն Խաչատուրյանը։
«Պետք է բոլորս գիտակցենք, որ խաղաղությունն է ապրելու, զարգանալու միակ ձևը։ Ոչ ոք պարտադրելով դրան չի հասնում, այն ուղղակի ապրելակերպ պետք է դառնա։ Իրենք կարող է ասեն` կռվենք կամ չգիտեմ ինչ, բայց եկեք մենք այնպես պարտադրենք նրանց, որ մեր խաղի կանոններով առաջնորդվեն։ Մենք պետք է խաղաղության թեզով նրանց հետ հարաբերություններ հաստատենք»,–ասել է Խաչատուրյանը։
Իսկ այն, որ խաղաղությունը պարտադրում են, ըստ Խաչատրյանի, հնացած թեզ է` ի՞նչ է նշանակում խաղաղությունը պարտադրում են։ Հարցին, թե կրո՞ւմ է խաղաղ դարաշրջան բացելու` իշխանության փիլիսոփայությունը, Խաչատուրյանը պատասխանեց, որ ինքն այդպիսինն է ուղղակի։ Նա չի պատկերացնում, որ հարևանների հետ կարելի է կռվել, փոխարենը գտնում է, որ պետք է միայն խաղաղ պայմաններում ապրել։
Անդրադառնալով հայ–թուրքական վերջին զարգացումներին` Խաչատուրյանը նշեց, որ շատ դրական է վերաբերվում, միայն ողջունելի է այդ ամենը։ «Դա պետք է շարունակել և հանգուցալուծում պետք է լինի, որը կբերի մեր քաղաքական, տնտեսական հարաբերություններին։ Բացի այդ, ես չեմ հավատում, որ մենք բոլոր նախապայմանները կատարել ենք, և համոզված եմ, որ չկա որևէ նախապայման։ Ես հավատում եմ իշխանության և Թուրքիայի հետ շփման մեր հատուկ ներկայացուցիչ Ռուբեն Ռուբինյանի հայտարարություններին»,–ասաց Խաչատուրյանը։
Նա հավելեց, որ համոզված է` նախապայմանների կարիք չկա այլևս։
Հիշեցնենք, որ Երևանն ու Անկարան 2021 թվականի դեկտեմբերին հայտարարեցին, որ պատրաստ են հարաբերությունների կարգավորմանն ուղղված հստակ քայլեր ձեռնարկել և երկուստեք հատուկ ներկայացուցիչներ նշանակեցին, Անկարան՝ Վաշինգտոնում Թուրքիայի նախկին դեսպան Սերդար Քըլըչին, իսկ Հայաստանը՝ Ազգային ժողովի նախագահի տեղակալ Ռուբեն Ռուբինյանին։
Ընթացիկ տարվա հունվարի 14-ին Հայաստանի և Թուրքիայի հատուկ ներկայացուցիչները հանդիպեցին Մոսկվայում։