ԵՐԵՎԱՆ, 2 փետրվարի – Sputnik. Թուրքիայում կայանալիք Թաիլանդական բռնցքամարտի Եվրոպայի առաջնությունից կան մեդալների ակնկալիքներ, և Ստամբուլում անպայման կբարձրանա հայոց եռագույնը։ Sputnik Արմենիայի մամուլի կենտրոնում կայացած ասուլիսի ժամանակ նման հայտարարություն արեց Հայաստանի թաիլանդական բռնցքամարտի (մուայթայ) ֆեդերացիայի նախագահ Արտակ Բրուտյանը։
«Կորոնավիրուսային համավարակից և արցախյան 44-օրյա պատերազմից հետո սա առաջին լուրջ մրցաշարն է, որին պատրաստվել ենք հավուր պատշաճի, և հաշվի առնելով հատկապես մրցաշարի անցկացման վայրը` կարելի է ասել, որ այն մեզ համար ունի նաև սկզբունքային նշանակություն»,– ասաց թաիլանդական բռնցքամարտի ֆեդերացիայի նախագահը։
Նրա խոսքով` ֆեդերացիան հիմնադրման օրից ի վեր պետությունից որևէ աջակցություն չի ստացել։ ԿԳՄՍ նախարարությունը, ըստ Բրուտյանի, այս հարցը քննարկելու է փետրվարին կայանալիք նիստում։ Գերատեսչությունից խոստացել են մարզաձևի ֆեդերացիային հատկացվելիք գումարն ընդգրկել 2023 թվականի բյուջեում։
«Իսկ մինչ այդ Եվրոպայի առաջնություն մեկնելու ծախսերը հոգացել ենք իմ անձնական միջոցների ու ընկերներիս նվիրատվությունների շնորհիվ։ Ամեն ինչ պետք է անել, որպեսզի մեր մարզիկների մասնակցությունն ապահովվի, որպեսզի նրանք չհիասթափվեն, այլ լինեն բարձր մոտիվացված»,– ասաց թաիլանդական բռնցքամարտի ֆեդերացիայի նախագահը։
Նշենք, որ Թաիլանդական բռնցքամարտի (մուայթայ) Եվրոպայի առաջնությունը Ստամբուլում կմեկնարկի փետրվարի 13–ին։
Հայաստանի պատվիրակության կազմում ընդգրկված են երկու մարզիչ և ինը մարզիկ։
Վերջիններս տարբեր քաշային կարգերում կմասնակցեն մեծահասակների, երիտասարդական ու պատանեկան մրցաշարերին։ Ֆեդերացիայի նախագահի հավաստմամբ` Ստամբուլ մեկնողների թվում կան միջազգային մրցաշարերի մասնակցած ու մրցանակների արժանացած մարզիկներ, որոնցից մեծ սպասելիքներ կան։
Նշենք, որ ՄՕԿ–ի գործադիր կոմիտեի 2021 թվականի հուլիսի 20–ի որոշմամբ`Թաիլանդական բռնցքամարտը ճանաչվել է որպես օլիմպիական մարզաձև։