ԵՐԵՎԱՆ, 2 փետրվարի – Sputnik. ՀՀ վարչապետ Նիկոլ Փաշինյանի նախկին մամուլի խոսնակ Մանե Գևորգյանը նոր աշխատանքի հրավեր է ստացել։ Տեղեկությունը հայտնում է «Հրապարակ» օրաթերթը։
Պարբերականի տեղեկություններով` նրան աշխատանքի առաջարկ է արել ՀՀԿ–ական նախկին պատգամավոր, գործարար Արման Սահակյանը` «Սովրանոյի Արմանը»։ Օրաթերթը Մանե Գևորգյանի հետ հարցազրույց է արել, որի ժամանակ այդ մասին հարցրել է։
«Այս պահին աշխատում եմ ներդրումային ծրագրում, որը նախատեսվում է իրականացնել Գյումրիում, ներդումային ծրագիրը ծավալուն է, իր մեջ ներառում է կրթական և սոցիալական կոմպոնենտներ»,– նշել է վարչապետի նախկին մամուլի խոսնակը։
Ասել է, որ աշխատանքի առաջարկը եղել է հենց Արման Սահակյանից, որը համարվում է այդ ծրագրի իրականացնողը, Մանեն էլ աջակցում է կառավարության հետ կապերի հարցում, քանի որ որոշակի հարցեր կան, որ պետք է վերջնականացնել, այդ առումով ներգրավվել է աշխատանքներում։
«Հրապարակի» հարցին` մամուլի քարտուղարի պարտականությունները թողնելուց հետո կառավարության հետ կապ պահո՞ւմ է, թե՞ ոչ կամ շփում ունի՞ Նիկոլ Փաշինյանի հետ, նշել է, որ գործադիրի տարբեր անդամների հետ բարիդրացիական կապերը շարունակում է պահպանել։
Ծրագրի մասով աշխատանքները տարվում են փոխվարչապետ Համբարձում Մաթևոսյանի և նրա գրասենյակի հետ։
Հիշեցնենք, որ Մանե Գևորգյանը վարչապետի մամուլի խոսնակի պաշտոնից ազատվել է 2021 թվականի նոյեմբերի 9-ին։ Այդ պաշտոնին էր նշանակվել 2020-ի մարտի 2-ին։ Իսկ դրանից առաջ նա «Ավրորա» մարդասիրական նախաձեռնության IDeA հիմնադրամի միջազգային լրատվամիջոցների հետ կապերի համակարգողն էր։ Մանե Գևորգյանը նաև «Սիվիլնեթ» առցանց հեռուստատեսություն, «Սիվիլիթաս» հիմնադրամի գլխավոր պրոդյուսերն է եղել։