ԵՐԵՎԱՆ, 1 փետրվարի – Sputnik. Անկարան և Բաքուն խաղաղության ձեռք են մեկնել Հայաստանին։ Այսօր հայտարարել է Թուրքիայի պաշտպանության նախարար Հուլուսի Աքարը ադրբեջանցի պաշտոնակցի` Զաքիր Հասանովի հետ համատեղ ասուլիսի ընթացքում։
«Կարևոր հարցերից մեկն այն է, որ մեր նախագահի և պարոն Ալիևի բանակցություններից հետո խաղաղության ձեռք է մեկնվել Հայաստանին, մենք սպասում և ցանկանում ենք, որ այդ քայլը գնահատվի»,- ասել է Աքարը։
Նրա խոսքով` իրենք խաղաղության հաստատման են ձգտում ոչ միայն Հայաստանի ու Ադրբեջանի կամ Հայաստանի ու Թուրքիայի միջև, այլև ողջ տարածաշրջանում։
Հիշեցնենք` Հայաստանի և Թուրքիայի միջև դիվանագիտական հարաբերություններ չկան. 2009 թվականին Ցյուրիխում երկու երկրների արտգործնախարարները դիվանագիտական հարաբերություններ հաստատելու մասին արձանագրություններ ստորագրեցին, սակայն այդ փաստաթղթերն այդպես էլ չվավերացվեցին։
Երևանն ու Անկարան 2021 թվականի դեկտեմբերին հայտարարեցին, որ պատրաստ են հարաբերությունների կարգավորմանն ուղղված հստակ քայլեր ձեռնարկել և երկուստեք հատուկ ներկայացուցիչներ նշանակեցին, Անկարան՝ Վաշինգտոնում Թուրքիայի նախկին դեսպան Սերդար Քըլըչին, իսկ Հայաստանը՝ Ազգային ժողովի նախագահի տեղակալ Ռուբեն Ռուբինյանին։
Հունվարի 14-ին Հայաստանի և Թուրքիայի հատուկ ներկայացուցիչները հանդիպեցին Մոսկվայում։
Ավելի ուշ ԱԳՆ–ն հայտարարեց, որ կողմերը համաձայնել են շարունակել լիարժեք կարգավորմանն ուղղված բանակցությունները՝ առանց նախապայմանների։