ԵՐԵՎԱՆ, 1 փետրվարի – Sputnik. Սերբիայում 5 ամիս կալանքի տակ մնալուց հետո ազատ է արձակվել ԵԱՀԿ-ում Հյուսիսային Մակեդոնիայի առաքելության ղեկավարի նախկին տեղակալ Միլե Միլենկովսկին, որը կալանավորվել էր Հայաստանի իշխանությունների նախաձեռնությամբ ստացված միջազգային օրդերի հիման վրա։
ՀՀ իշխանությունները նաև պահանջել էին նրան արտահանձնել Հայաստանին։
Ինչպես հայտնում է հյուսիսմակեդոնական Telma հեռուստաալիքը, նախկին դիվանագետն ազատ է արձակվել շաբաթ օրը, բայց այդ մասին հայտնի է դարձել միայն այսօր։
Սերբիայի վերաքննիչ դատարանը բավարարել է կալանավորման որոշման դեմ Միլենկովսկու բողոքը` միաժամանակ մերժելով Հայաստանի իշխանությունների արտահանձնման պահանջը։
Հիշեցնենք` Միլենկովսկին հայկական կողմի միջնորդությամբ ձերբակալվել էր 2021 թվականի օգոստոսի 27-ին Հյուսիսային Մակեդոնիայի տարածք մուտք գործելու պահին։
Ըստ ՀՀ իրավապահ մարմինների՝ 2018 թվականին Միլենկովսկին իր հայրենակից երկու այլ դիվանագետների հետ Հայաստանից դուրս էին բերել Հյուսիսային Մակեդոնիայի գործարար Բրանիսլավ Դիմիտրիևիչին, որը մի շարք հայ բարձրաստիճան պաշտոնյաների հետ կասկածվում էր «Հյուսիս–հարավ» ավտոճանապարհի շինարարական ծրագրերում խոշոր չափով յուրացում կատարելու մեջ։