ԵՐԵՎԱՆ, 1 փետրվարի – Sputnik. ՀՀ ԱԺ «Հայաստան» և «Պատիվ ունեմ» ընդդիմադիր խմբակցությունները դեռևս քննարկում են ՀՀ նախագահի պաշտոնում իրենց թեկնածուին առաջադրել–չառաջադրելու հարցը։ Sputnik Արմենիայի հետ զրույցում «Հայաստան» խմբակցության պատգամավոր Ագնեսա Խամոյանը նշեց, որ իրենք փորձում են հասկանալ` այս պահին որքանով է նպատակահարմար նախագահի թեկնածու առաջադրելը, երբ իշխանությունն ակնհայտորեն անցկացնելու է իր թեկնածուին։
Խամոյանը շեշտեց, որ առաջիկա 1-2 օրվա ընթացքում իրենց վերջնական որոշումը կհրապարակեն։ Հարցին` արդյոք այս հարցի շուրջ հանդիպում և քննարկում եղել է «Պատիվ ունեմ» խմբակցության հետ, պատգամավորը պատասխանեց` տրամաբանական է, որ ԱԺ 2 ընդդիմադիր ուժերը գուցե միասնական թեկնածու առաջադրեն։
«Կարծում եմ, որ թեկնածու լինելու դեպքում կարող է միասնական լինել»,– նշեց Խամոյանը։
Ագնեսա Խամոյան
© Sputnik / Aram Nersesyan
Նա անդրադարձավ նաև «Քաղաքացիական պայմանագիր» խմբակցության թեկնածու Վահագն Խաչատուրյանին։
«Մենք որոշ ակնկալիքներ ունեինք Արմեն Սարգսյանից, որ կկատարի Սահմանադրությամբ իրեն ընձեռնված լիազորությունները, որոնցից բողոքում էր, սակայն գործնականում չէր օգտագործում։ Վահագն Խաչատուրյանի դեպքում ակնկալիք ունենալը, մեղմ ասած, քաղաքական անմեղսունակություն կլինի, քանի որ Նիկոլ Փաշինյանը հայտարարել է` նախագահի թեկնածուն լինելու է մարդ, ով անվերապահորեն կատարելու է իր հրահանգները»,– նշեց Խամոյանը։
«Պատիվ ունեմ» խմբակցության քարտուղար, պատգամավոր Հայկ Մամիջանյանն էլ ասաց, որ իրենք, ըստ օրենքի, չունեն բավարար քանակությամբ պատգամավոր, որպեսզի բավարարի նախագահի թեկնածություն առաջադրելուն։
«Մենք այս պահին խորհրդակցում ենք «Պատիվ ունեմ» խմբակցության հետ ընդդիմության միասնական թեկնածու առաջադրելու վերաբերյալ։ Մեր քննարկումների հարցերից մեկն այն է, որ թեկնածու առաջադրելու պարագայում իշխանությունը մեծամասնություն է կազմում ու, միևնույնն է, քվեարկությամբ կարող է անցկացնել իր թեկնածուին։ Սա մեր խորհրդակցությունների ընթացքում նշվող կռվաններից մեկն է»,– նշեց Մամիջանյանը։
Նա շեշտեց, որ երկրի նախագահը պետք է հանդես գա որպես վերկուսակցական արբիտր, բայց այն քաղաքական ուժը, որը դատավորներին է հետապնդում կամ ՍԴ–ում փորձում է սեփական կամակատարներ ունենալ, հազիվ թե ունակ լինի անկողմնակալ նախագահի թեկնածու առաջադրել։
Հայկ Մամիջանյան
© Sputnik / Aram Nersesyan
Հիշեցնենք` հունվարի 23-ին ՀՀ նախագահ Արմեն Սարգսյանը հրաժարական տվեց՝ հայտարարելով, որ չի կարողանում օգտագործել իր ներուժի գերակշիռ մասը ի նպաստ համակարգային ներքին և արտաքին քաղաքական խնդիրների լուծման:
Այսօր պաշտոնապես հայտարարվեց, որ «Քաղաքացիական պայմանագիր» խմբակցության պատգամավորները ՀՀ նախագահի պաշտոնում կառաջադրեն բարձր տեխնոլոգիական արդյունաբերության նախարար Վահագն Խաչատուրյանի թեկնածությունը: