ԵՐԵՎԱՆ, 30 հունվարի –Sputnik․ Ռուսաստանցի հայտնի մարմնամարզիկ Արթուր Դալալոյանը հերքել է լուրերն այն մասին, որ մտադիր է ավարտել մարզական կարիերան: Այս մասին մարզիկը գրել է Instagram-ի իր էջում ։
Ավելի վաղ Արթուրը սոցցանցերում գրառում էր արել, որը շփոթմունքի մեջ էր գցել նրա երկրպագուներին։ Մասնավորապես, նա գրառման մեջ ակնարկել էր սպորտից հեռանալու մասին։ Ավելի ուշ մարզիկը հեռացրել էր հրապարակումը։
«Մի շարք լրատվամիջոցներ գրել են, որ ավարտում եմ կարիերաս։ Դա այդպես չէ։ Ինձ այնքան էլ ճիշտ չեն հասկացել։ Ես գրեցի, որ ընտանիքիս և սպորտի միջև ընտրում եմ ընտանիքը։ Բայց ես նկատի չունեի, որ ավարտում եմ կարիերաս։ Ես նկատի ունեի, որ հիմա մրցումներ չկան, և ինչ-որ հավաքներ կարող են բաց թողնվել, բայց, իհարկե, ես մնում եմ մարզիկ, և առջևում մեզ շատ մեծ մրցաշարեր են սպասվում»,- պարզաբանել է Արթուրը։
Մարզիկը լրատվամիջոցներին կոչ է արել իր մասին նյութերի հրապարակումից առաջ ճշտել ներկայացվող տվյալներն իր կամ իր ներկայացուցչի հետ։
Հիշեցնենք, որ Դալալոյանի առաջին գրառմանն արձագանքել էր Ռուսաստանի մարմնամարզության հավաքականի գլխավոր մարզիչ Անդրեյ Ռոդիոնենկոն։ Նա հերքել էր մարզիկի կարիերան ավարտելու մասին շրջանառվող լուրերը՝ հրապարակումը բացատրելով Դալալոյանի զգացմունքայնությամբ։