ԵՐԵՎԱՆ, 28 հունվարի – Sputnik. Հայկական կողմն այժմ փորձում է ճշտել, թե սահմանազատման և սահմանագծման համար այդ ի՞նչն է անընդունելի Ադրբեջանի համար։ Եռաբլուրում լրագրողների հետ զրույցում այս մասին ասաց ՀՀ ԱԳ նախարար Արարատ Միրզոյանը՝ պատասխանելով լրագրողներից մեկի հարցին։
Նշենք, որ 2022–ի հունվարի 20–ի ասուլիսի ժամանակ Ադրբեջանի արտգործնախարար Ջեյհուն Բայրամովը հայտարարել էր, թե Ադրբեջանը համաձայնել էր, որ սահմանազատման համար աշխատանքային խումբ ստեղծվի, բայց Հայաստանն այն ժամանակ մի շարք նախաձեռնություններ է առաջ քաշել, որոնք անընդունելի էին Բաքվի համար։
«Թե ինչն է անընդունելի, մենք հստակեցումները դեռ չունենք, ճշգրտման փուլում են դրանք։ Քննարկում անընդհատ կա, քննարկումը շարունակվում է»,-ասաց Միրզոյանը։
Նա հավելեց, որ հիմա փորձում ենք պարզաբանումներ ստանալ, թե հատկապես որ մասն է անընդունելի, ինչ հիմնավորմամբ և, ըստ այդմ, ինչպիսի նոր լուծումներ կարող են առաջ քաշվել։
Ավելի վաղ ՀՀ արտգործնախարար Արարատ Միրզոյանը խորհրդարանում հայտնել էր, որ Հայաստանը Մոսկվայի միջոցով Ադրբեջանին է փոխանցել սահմանային գոտում ապաէսկալացման առաջարկների փաթեթը:
Նա հավելել էր, որ առաջարկները բխում են վարչապետի կողմից մշտապես բարձրացվող՝ զորքերի հայելային հեռացման և անվտանգության լրացուցիչ մեխանիզմների ստեղծման հարցերից։
Ակնկալվում է, որ առաջարկների իրագործումը կարող է արագացնել սահմանազատման և սահմանագծման հանձնաժողովի ստեղծումը: Սահմանին իրավիճակի ապաէսկալացման առաջարկությունների վերաբերյալ Հայաստանը դեռ գրավոր պատասխան չի ստացել Ադրբեջանից։